مانسہرہ۔ 24 اپریل (اے پی پی):مانسہرہ پولیس نے بروقت کارروائی کرتے ہوئے چوری شدہ سوزوکی مہران گاڑی برآمد کر کے واردات میں ملوث ملزم کو گرفتار کر لیا۔ مانسہرہ پولیس کے مطابق 20 اپریل 2025 کو بالاکوٹ کے رہائشی نے تھانہ بالاکوٹ میں درخواست دی کہ گھر کے باہر کھڑی ہونے والی اس کی گاڑی نامعلوم افراد نے چوری کر لی ہے۔ اطلاع ملتے ہی تھانہ بالاکوٹ پولیس نے فوری کارروائی کا آغاز کیا۔
ڈی پی او مانسہرہ شفیع اللہ گنڈا پور نے واقعے کا فوری نوٹس لیتے ہوئے ملزمان کے جلد گرفتاری کے احکامات جاری کئے۔ ان احکامات کی روشنی میں ایس پی بالاکوٹ جہانزیب خان اور ڈی ایس پی بالاکوٹ صداقت نثار کی نگرانی میں ایس ایچ او تھانہ بالاکوٹ فہد شاہ نے اپنی ٹیم کے ہمراہ بھرپور ایکشن لیتے ہوئے جدید ٹیکنیکل وسائل استعمال کئے۔
محنت اور لگن سے کی جانے والی اس کامیاب کارروائی کے نتیجے میں چوری شدہ گاڑی کو برآمد کر کے ملزم عماد خان ولد صابر حسین سکنہ منور کاغان حال ماڑی کو گرفتار کر لیا گیا۔ پولیس کی جانب سے مزید تفتیش جاری ہے تاکہ کسی بھی ممکنہ سہولت کار یا مزید ملزمان تک پہنچا جا سکے۔
Short Link: https://urdu.app.com.pk/urdu/?p=587063
