اسلام آباد۔30اپریل (اے پی پی):وفاقی وزیر داخلہ محسن نقوی نے جناح سکوائر مری روڈ انڈر پاس منصوبے کا جائزہ لینے کے لئے رات گئے دورہ کیا۔ انڈر پاس کی کھدائی مکمل کر لی گئی ہے جبکہ سٹیل فکسنگ سٹرکچر کا کام تیزی سے جاری ہے۔ وزیر داخلہ محسن نقوی نے جناح سکوائر مری روڈ انڈر پاس پر تعمیراتی کام پر پیشرفت کا جائزہ لیا اور کام کی رفتار پر اطمینان کا اظہار کیا۔ انہوں نے جناح سکوائر مری روڈ انڈر پاس پراجیکٹ کو مقررہ مدت میں مکمل کرنے کی ہدایت کرتے ہوئے کہا کہ ریکارڈ مدت میں منصوبے کی تکمیل کے لیے تمام تر توانائیاں بروئے کار لائی جائیں۔
وزیر داخلہ نے جناح سکوائر سے فیض آباد چوک تک شاہراہ کو ماڈل روڈ بنانے کی ہدایت کی۔ وفاقی وزیرداخلہ محسن نقوی نے ہدایت کی کہ جناح سکوائر سے فیض آباد چوک تک شاہراہ پر خوبصورت لائٹس لگائی جائیں اور لینڈ سکیپنگ کی جائے۔ وزیر داخلہ محسن نقوی نے مارگلہ روڈ پر شاہین چوک کا بھی دورہ کیا۔ ٹریفک کے رش کے خاتمےکیلئے مارگلہ روڈ کو مرحلہ وار سگنل فری بنایا جائے گا۔
وزیر داخلہ نے فیض آباد انٹرچینج کی ری ماڈلنگ پر کام جلد شروع کرنے کی ہدایت کرتے ہوئے کہا کہ فیض آباد انٹرچینج اسلام آباد اور راولپنڈی کے درمیان اہم ترین کنکشن ہے، فیض آباد انٹرچینج کو کشادہ کیا جائے گا تاکہ ٹریفک کے بہائو میں بہتری لائی جا سکے۔ انہوں نے کہا کہ ہمارا مقصد اسلام آباد کو عوامی سہولتوں کے حوالے سے عالمی معیار کا شہر بنانا ہے۔
چیئرمین سی ڈی اے محمد علی رندھاوا نے منصوبوں سے متعلق وزیر داخلہ محسن نقوی کو بریفنگ دیتے ہوئے کہا کہ جناح سکوائر مری روڈ انڈر پاس پراجیکٹ پر کام تیزی سے جاری ہے، انشاءاللہ منصوبے کو مقررہ وقت میں مکمل کیا جائے گا۔ بریفنگ میں مزید بتایا گیا کہ مارگلہ روڈ پر سب سے زیادہ رش شاہین چوک کے مقام پر ہوتا ہے، شاہین چوک پر انڈر پاس کی تعمیر مارگلہ روڈ پر ٹریفک کے بہائو کو بہتر بنانے میں معاون ثابت ہو گی۔
Short Link: https://urdu.app.com.pk/urdu/?p=590444
