لاہور۔30اپریل (اے پی پی):خاتون محتسب پنجاب نبیلہ حاکم خان نے سی ای او ہیلتھ اتھارٹی ڈاکٹر معیز منصور،ڈائریکٹر ہیلتھ سروسز گوجرانوالہ ڈویژن ڈاکٹر فرجاد احمد بٹ اور ڈائریکٹر کالجز ڈاکٹر امان اللہ راٹھور کے دفاتر کا اچانک دورہ کرکے اینٹی ہراسمنٹ کمیٹیوں کی فعالیت بارے معلومات حاصل کیں۔ بعد ازاں انہوں نے ڈسٹرکٹ ہیڈ کوارٹر ٹییچنگ سول ہسپتال کا بھی اچانک دورہ کیا اور تمام دفاتر میں ہراسمنٹ کی روک تھام کیلئے کوڈ آف کنڈکٹ /قانون سے آگاہی بارے پینا فلیکسز نمایاں جگہوں پر آویزاں کرانے کے احکامات جاری کئے۔
اس موقع پر پی ایس او ٹو خاتون محتسب پنجاب حافظ فاروق انور،لا آفیسر ظہیر عباس ،ایم ایس ڈی ایچ کیو ٹیچنگ ( سول)ہسپتال ڈاکٹر ارشاد اللہ گورائیہ اور ڈپٹی ڈائریکٹر تعلقات عامہ منور حسین بھی انکے ہمراہ تھے۔میڈم نبیلہ حاکم خان نے ریجنل آفس گوجرانوالہ کے دورہ کے بعد سی ای او ہیلتھ اتھارٹی ،ڈائریکٹر ہیلتھ سروسز اور ڈائریکٹر کالجز کے دفاتر کا معائنہ کیا،لیکن کہیں پر بھی کوڈ آف کنڈکٹ آویزاں نہ تھا اور نہ ہی ہراسمنٹ کمیٹیز کا قیام عمل میں لایا گیا تھا،جس پر صوبائی خاتون محتسب پنجاب نے سخت برہمی کا اظہار کیا اور انہیں شو کاز نوٹس بھی جاری کیا اور ان تینوں آفیسرز کو7 مئی کو ہیڈ آفس طلب کر لیا۔
انہوں نے ڈسٹرکٹ ہیڈ کوارٹر ٹییچنگ (سول)ہپستال کا بھی دورہ کیا اور ہسپتال کے مختلف شعبوں کا معائنہ بھی کیا۔ انہوں نے ہسپتال میں صفائی ستھرائی کے انتظامات پر اطمینان کا اظہار کیا اور ہسپتال کی اینٹی ہراسمنٹ کمیٹی سے موصول درخواستوں کی تفصیل بھی طلب کی۔بعد ازاں انہوں نے یو بی ایل برانچ شمسی چوک کا بھی دورہ کیا اور مرد و خواتین کو ایکٹ کے حوالے سے آگاہی دی ۔انہوں نے کہا کہ گوجرانوالہ ڈویژن میں اینٹی ہراسمنٹ کمیٹیوں کی ٹریننگز کرائی جائیں گی۔
انہوں نے ہدایت کی کہ تمام سرکاری دفاتر میں فوکل پرسنز کا تقرر کیا جائے، ہسپتالوں اور تعلیمی اداروں میں جنسی ہراسانی کے واقعات بڑھ رہے ہیں جن کی روک تھام کیلئے اجتماعی تحریک شروع کرنے کی ضرورت ہے۔سرکاری اور نجی دفاتر میں خواتین کو کام کیلئے محفوظ ماحول کی فراہمی ترجیح ہے۔نبیلہ حاکم خان نے ہراسمنٹ کے خلاف عوام تک آواز پہنچانے میں میڈیا کے کردار کو سراہا۔
انہوں نے مزید کہا کہ جنسی ہراسانی کے کوڈ آف کنڈکٹ پر عملدرآمد کو یقینی بنانا ہوگا اور چیک اینڈ بیلنس کو قائم کرنا ہوگا۔اس ضمن میں ہر محکمہ اینٹی ہراسمنٹ کمیٹی کو فعال کرے۔بعد ازاں انہوں نے ایم ایس ڈی ایچ کیو ہسپتال ڈاکٹر ارشاد اللہ گورائیہ کے ہمراہ میڈیا کے نمائندوں سے گفتگو بھی کی۔
Short Link: https://urdu.app.com.pk/urdu/?p=590446
