اسلام آباد۔30اپریل (اے پی پی):پاکستان سنگل ونڈو (پی ایس ڈبلیو)، کیئر پاکستان اور ماسٹر کارڈ کے مابین پاکستان میں خواتین کے چھوٹے کاروبار میں مدد دینے کے لئے ایک معائدے طے پایا گیا ہے ۔اس شراکت داری کے تحت خواتین کو آن لائن کاروبار کے لئے ضروری تربیت دی جائے گی، ان کا نیٹ ورک مضبوط بنایا جائے گا اور انہیں بیرونِ ملک تجارت کے مواقع فراہم کئے جائیں گے۔یہ کام ’’ سٹرائیو وومن پروگرام ‘‘کے ذریعے کیا جائے گا جو کیئر چلا رہا ہے اور ماسٹر کارڈ سینٹر فار انکلیوسِو گروتھ اس کی مدد کر رہا ہے۔
یہ پروگرام پاکستان، پیرو اور ویتنام میں خواتین کے کاروبار کو مضبوط بنانے کے لئے کام کر رہا ہے۔’’پاکستان سنگل ونڈو ‘‘ایک ڈیجیٹل سسٹم ہے جو بیرونی تجارت کو آسان اور کم خرچ بناتا ہے۔ پاکستان سنگل ونڈو کا "خدیجہ پروگرام” خاص طور پر خواتین کے لئے بنایا گیا ہے جو انہیں آن لائن سہولتیں، تجارتی معلومات اور تربیت فراہم کرتا ہے۔ پاکستان سنگل ونڈو کے سی ای او سید آفتاب حیدر نے کہا کہ ہم چاہتے ہیں کہ پاکستان کی خواتین آسانی سے کاروبار کریں اور ترقی کریں۔ کیئر پاکستان کے ساتھ ہماری یہ شراکت داری انہیں سیکھنے، جڑنے اور آگے بڑھنے کے مواقع فراہم کرے گی۔
کیئر پاکستان کے کنٹری ڈائریکٹر عادل شیراز نے کہا کہ خواتین ہماری معیشت کے لئے بہت اہم ہیں، اگر ہم مل کر ان کی رکاوٹیں کم کریں تو وہ بہت آگے جا سکتی ہیں۔ماسٹر کارڈ کے کنٹری منیجر ارسلان خان نے کہا کہ ہم پہلے ہی دنیا بھر میں لاکھوں چھوٹے کاروباروں کو ڈیجیٹل معیشت سے جوڑ چکے ہیں، اب ہم پاکستان کی خواتین کی مدد کرنا چاہتے ہیں تاکہ ان کا کاروبار مزید بڑھے۔ ماسٹر کارڈ سینٹر فار انکلیوسِو گروتھ کی نائب صدر سبھاشنی چندرن نے کہا کہ خواتین کے کاروبار پوری دنیا میں معیشت کا اہم حصہ ہیں، جب ہم انہیں مالی سہولتیں دیتے ہیں تو ان کا کاروبار تیزی سے ترقی کرتا ہے۔
یہ شراکت داری خواتین کو درج ذیل سہولتیں فراہم کرے گی جن کاروبار شروع کرنے اور بڑھانے کے لئے تربیت، برآمدات کو فروغ دینے کے لئے لیڈرشپ اور ڈیجیٹل مہارتوں کی تربیت، تجربہ کار افراد اور دیگر خواتین سے سیکھنے اور جڑنے کے مواقع، ایسی پالیسیاں بنانے میں مدد جو خواتین کے لئے کاروبار آسان بنائیں، تحقیق اور معلومات کا تبادلہ ، مشترکہ ورکشاپس، تقریبات اور مہمات میں شرکت، شامل ہیں۔
Short Link: https://urdu.app.com.pk/urdu/?p=590464
