پہلگام فالس فلیگ ، بھارت کی جانب سے لائن آف کنٹرول کے کیانی اور منڈل سیکٹرز پر بلااشتعال فائرنگ ، پاک فوج کا بھارتی فوج کو منہ توڑ جواب دیا

اسلام آباد۔30اپریل (اے پی پی):پہلگام فالس فلیگ کے بعد بھارت کی جانب سے لائن آف کنٹرول کے کیانی اور منڈل سیکٹرز پر بلااشتعال فائرنگ کی گئی ، پاک فوج نے بھرپور جوابی کارروائی کرتے ہوئے بھارتی فوج کو منہ توڑ جواب دیا، موثر جواب سے دشمن کو خاموش کروا دیا گیا ۔ سیکیورٹی ذرائع کے مطابق 29 اور 30 اپریل کی درمیانی شب بھارت نے لائن آف کنٹرول پر سیز فائر کی خلاف ورزی کی،بھارت کی جانب سے لائن آف کنٹرول کے کیانی اور منڈل سکیٹر میں بلااشتعال فائرنگ کی گئی،بھارت کی جانب سے بلااشتعال فائرنگ میں چھوٹے ہتھیاروں کا استعمال کیا گیا ۔

پاکستان فوج کے موثر جواب سے دشمن کے متعدد مورچے تباہ ہونے کی بھی اطلاعات ہیں ۔ سکیورٹی ذرائع کا کہنا ہے کہ مقبوضہ کشمیر میں واقع لائن آف کنٹرول پر بھارتی چکپترا پوسٹ کو تباہ کر دیا گیا، اس سے قبل بھارت نے مقبوضہ کشمیر کے سرحدی علاقوں کو بھی خالی کروالیا ہے اور مسلمانوں کیخلاف کریک ڈاؤن جاری ہے۔سکیورٹی ذرائع کا کہنا ہے کہ بھارت کی طرف سے یہ اشتعال انگیزی اسکے جنگی جنون کا غماز ہے،پاک فوج ملکی سالمیت کے دفاع کیلئے ہمہ وقت تیار ہے ۔

Short Link: https://urdu.app.com.pk/urdu/?p=590535