لاہور۔30اپریل (اے پی پی):پنجاب پولیس میں جرائم کی بیخ کنی کے لئے بہترین کارکردگی کا مظاہرہ کرنے والے پولیس افسران و اہلکاروں کی حوصلہ افزائی جاری ہے جس کے تسلسل میں انسپکٹر جنرل پولیس پنجاب ڈاکٹر عثمان انور نے مزید 172 افسران و اہلکاروں کیلئے 34 لاکھ 40 ہزار روپے کے کیش انعامات اور تعریفی اسناد کے احکامات جاری کیے ہیں۔
ترجمان پنجاب پولیس نے بتایا کہ افسران و اہلکاروں کو 20 ہزار روپے فی کس کیش ایوارڈ اور تعریفی اسناد سے نوازا گیا۔انعامات حاصل کرنے والوں میں 1 انسپکٹر، 3 سب انسپکٹرز، 9 اے ایس آئیز شامل ہیں اسی طرح 30 ہیڈ کانسٹیبلز اور 129 کانسٹیبلز کو بھی کیش انعامات اور تعریفی اسناد سے نوازا گیا۔
آئی جی پنجاب ڈاکٹر عثمان انور نے کہا کہ افسران و اہلکاروں نے لا اینڈ آرڈر کے قیام اور شہریوں کے جان و مال کے تحفظ کیلئے احسن طریقے سے فرائض انجام دئیے۔آئی جی پنجاب نے مزید کہا کہ خدمت خلق کے جذبے سے سرشار فرض شناس اور باہمت افسران و اہلکار پنجاب پولیس کا اثاثہ ہیں۔
Short Link: https://urdu.app.com.pk/urdu/?p=590666
