اسلام آباد۔01مئی (اے پی پی):وزیر اعظم محمد شہباز شریف نے کہا ہے کہ ہم اپنے محنت کشوں کے لیے روزگار کے حصول کے دوران محفوظ، صحت مند اور باوقار حالات کو فروغ دینے کے لیے اپنے غیر متزلزل عزم کا اعادہ کرتے ہیں،پاکستان نے مزدوروں اور افرادی قوت کے تحفظ کو مزید مضبوط بنانے کے لیے اہم قانون سازی اور انتظامی اصلاحات کی ہیں، پیشہ وارانہ تربیت کے ذریعے ترجیحی بنیادوں پر نوجوانوں اور خواتین کو بااختیار بنانے پر خصوصی توجہ دی جا رہی ہے ۔
وزیراعظم آفس کے میڈیا ونگ سے جاری بیان کے مطابق مزدوروں کے عالمی دن کے موقع پر اپنے پیغام میں وزیراعظم نے کہا کہ آج جب پاکستان سمیت دنیا بھر میں یوم مزدوراں منایا جا رہا ہے، پاکستان اپنے محنت کشوں کے لیے روزگار کے حصول کے دوران محفوظ، صحت مند اور باوقار حالات کو فروغ دینے کے لیے اپنے غیر متزلزل عزم کا اعادہ کرتا ہے ، ہماری محنت کش افرادی قوت ہماری قوم کی ترقی اور حالات سے نمٹنے کی ہماری استعداد کے پیچھے اصل محرک ہے۔انہوں نے کہا کہ مزدوروں کے بنیادی حقوق کا تحفظ پاکستان کے آئین میں درج ہے اور یہ انٹرنیشنل لیبر آرگنائزیشن (آئی ایل او) کے بنیادی کنونشنز کے ساتھ مکمل طور پر ہم آہنگ ہے جس کا پاکستان بطور ایک ذمہ دار دستخط کنندہ ملک ہے۔
شہباز شریف نے کہا کہ ان نظریات کی پیروی میں پاکستان نے مزدوروں اور افرادی قوت کے تحفظ کو مزید مضبوط بنانے کے لیے اہم قانون سازی اور انتظامی اصلاحات کی ہیں، پیشہ ورانہ ذمہ داریوں کی انجام دہی کے دوران حفاظت اور صحت سے متعلق نئے وعدوں کی تکمیل کرتے ہوئے ہم نے کلیدی بین الاقوامی لیبر کنونشنز بشمول جبری مزدوری کنونشن اور میری ٹائم لیبر کنونشن کے 2014 کے پروٹوکول کی توثیق کی ہے۔انہوں نے کہا کہ پہلی بار پاکستان میں ہر مزدور قومی پیشہ ورانہ حفاظت اور صحت کی سہولیات سے مستفید ہو رہا ہے جو پورے ملک میں روزگار کے حصول کے ماحول کو محفوظ اور صحت مند جگہوں میں تبدیل کرنے کو یقینی بنا رہا ہے۔
وزیراعظم نے کہا کہ ہماری حکومت نے ایمپلائز اولڈ ایج بینیفٹ انسٹی ٹیوشن (ای او بی آئی) اور ورکرز ویلفیئر فنڈ (ڈبلیو ڈبلیو ایف) جیسے اداروں میں شمولیت کو وسیع اور انہیں موثر بنانے کیلئے اہم اقدامات کیے ہیں، اس بات کو یقینی بناتے ہوئے کہ ہمارے مزدوروں کے تحفظ کے ثمرات افرادی قوت کے تمام طبقات میں زیادہ مساوی طور پر تقسیم کیے جائیں۔
انہوں نے کہا کہ ڈیجیٹائزیشن اور لیبر لاء ریفارمز کے ذریعے ہم ایک ایسے مستقبل کی تعمیر کر رہے ہیں جہاں ہر مزدور کو باوقار اور محفوظ روزگار تک رسائی حاصل ہو، اس کے ساتھ ساتھ ہنر و پیشہ ورانہ تربیت کی ترقی کے اقدامات خاص طور پر نیشنل ووکیشنل اینڈ ٹیکنیکل ٹریننگ کمیشن (NAVTTC) اور ٹیکنیکل ایجوکیشن اینڈ ووکیشنل ٹریننگ اتھارٹیز (TEVTAs) کے ذریعے ترجیحی بنیادوں پر نوجوانوں اور خواتین کو بااختیار بنانے پر خصوصی توجہ دی جا رہی ہے۔
وزیراعظم نے کہا کہ اس اہم دن پر میں مزدوروں، کارکنوں، سول سوسائٹی اور حکومت سمیت تمام سٹیک ہولڈرز سے گزارش کرتا ہوں کہ وہ ایک ایسے معاشرے کی تعمیر میں اپنا بھرپور کردار ادا کریں جو مزدوروں کا احترام کرے، ان کے حقوق کو برقرار رکھے اور سب کے لیے باوقار روزگار کے حصول کے مواقع پیدا کرے۔
Short Link: https://urdu.app.com.pk/urdu/?p=590753
