اسلام آباد۔4مئی (اے پی پی):شیر میسور فتح علی المعروف ٹیپو سلطان کی برسی اتوار 4 مئی کو منائی گئی۔ ٹیپو سلطان10 نومبر 1750 کو میسور میں پیدا ہوئے ۔ ایک صوفی بزرگ ٹیپو مستان شاہ کے نام کی مناسبت سے ان کا نام فتح علی ٹیپو رکھا گیا ۔حیدر علی کے فرزند اپنی پیدائش کے بعد ایک سال کی عمر میں ہی حیدر علی ڈنڈی گل کے گورنر ہو گئے۔
انہوں نے انگریزوں کے بجائے اپنی فوج کی تربیت کے لیے فرانسیسی فوجیوں کو مقرر کیا۔پانچ سال کی عمر میں ٹیپو سلطان کی عربی اور فارسی تعلیم کا انتظام کیا گیا۔ اس کے بعد انہوں نے فنون سپا ہ گری اور شہ سواری سیکھی۔ 15 سال کی عمر میں ہی حیدر علی کے زمانے میں ٹیپو سلطان نے کئی معرکے سر کر لیے اور سات دسمبر 1782کو حیدر علی کی موت کے بعد سلطنت کی ساری ذمہ داریاں ٹیپو سلطاننے سنبھال لیں۔
ٹیپو سلطان کی شجاعت اور جواں مردی کی داستانیں ہر جگہ مشہور تھیں ۔ انگریز فوج کو ان کی حکمت عملی کے سبب ہر جگہ پسپا ہو نا پڑتا تھا اسی لیے انگریزوں نے غدار میر صادق کو خریدا اور اسی کی غداری کے سبب ٹیپو سلطان کوشہید کیا گیا۔ٹیپو سلطان نے صرف 48سال کی عمر پائی اور 17 برس تک حکمرانی کی لیکن اس عرصہ میں انہوں نے حکمرانی کی ایک نئی داستان رقم کی، ہمت ،جرات اور شجاعت کی بھی ایک نئی کہانی تحریر کی۔
ٹیپو سلطان برصغیر پاک و ہند کا ایسا کردار ہیں جن پر درجنوں ناول لکھے گئے اردو میں اس حوالے سےپہلا ناول نسیم حجازی نے تحریر کیا جس کا نام ‘اور تلوار ٹوٹ گئی’ تھا جو بہت مقبول ہوا۔اس کے علاوہ بھگوان ایس گدوانی کے ناول سورڈ آف ٹیپو سلطان کو بے حد مقبولیت حاصل ہوئی۔
بھگوان ایس گدوانی نے خود اپنے انٹر ویومیں کہا تھا کہ ان کے والد ہندو مہا سبھا کے صدر رہے تھے لیکن انہوں نے جب تاریخ کا مطالعہ کیا تو پتہ چلا کہ ٹیپو سلطان دنیا کے واحد ایسے شہنشاہ ہیں جنہوں نے میدان جنگ میں اپنی جان دی اور سارے زخم ان کے سینے پر لگے تھے۔ یہ مرتبہ دنیا کے کسی سلطان کو حاصل نہیں ہے اور وہ اسے نظرانداز نہیں کر سکتے تھے۔ ٹیپو سلطان 4 مئی 1799ءمیں اپنے وطن کیلئے لڑتے ہوئے شہید کر دیئے گئے۔ ان کی برسی کے موقع پرزندگی کے مختلف شعبوں سے تعلق رکھنے والے افراد کی جانب سے ٹیپو سلطان کی بہادری اور خدمات کو شاندار انداز میں خراج تحسین پیش کیا گیا۔
Short Link: https://urdu.app.com.pk/urdu/?p=592159
