ریاض۔10مئی (اے پی پی):سعودی عرب کے محکمہ شہری دفاع نے ملک کے بیشتر علاقوں میں اتوار تک گرج چمک کے ساتھ بارش کی پیشنگوئی کی ہے۔اردو نیوز کے مطابق مکہ مکرمہ ریجن میں درمیانے درجے سے تیز بارش کے ساتھ ژالہ باری، سیلاب اور گرد آلود ہوائیں چلنے کا امکان ہے، جس سے طائف، میسان، المویہ، تربہ، الخرمہ اور رانیہ کے علاقے متاثر ہوں گے۔
ریاض میں بھی ہلکی سے درمیانے درجے کی بارش، سیلاب، ژالہ باری اور گرد آلود ہوائیں چلنے کا امکان ہے، جس سے عفیف، الدوامی، القویعہ اور شقرا سمیت کئی علاقے زد میں رہیں گے۔جازان، عسیر، الباحہ اور مدینہ منورہ کے علاقوں میں ہلکی سے تیز بارش اور ژالہ باری کا امکان ہے جبکہ نجران اور قصیم میں ہلکی سے درمیانے درجے کی بارش کی زد میں رہیں گے۔محکمہ شہری دفاع نے شہریوں کو احتیاطی تدابیر اختیار کرنے کی ہدایت کی ہے۔بیان میں کہا گیا ہے
کہ شہری اور رہائشی سیلاب سے متاثرہ علاقوں، وادیوں اور نشیبی مقامات کے قریب نہ جائیں۔ ایسے مقامات پر جہاں بارش کا پانی جمع ہوجاتا ہے تیراکی سے گریز کریں۔بارش کے دوران سوشل میڈیا سمیت مختلف ذرائع ابلاغ کے توسط سے جاری کی جانے والی ہدایات کی پابندی کی جائے۔
Short Link: https://urdu.app.com.pk/urdu/?p=595157
