اسلام آباد۔11مئی (اے پی پی):چیئرمین سینٹ سید یوسف رضا گیلانی سرکاری دورے پر روس پہنچ گئے، دورے کی دعوت روس کی فیڈریشن کونسل کی چیئرپرسن ویلنٹینا مٹوینکو نے دی تھی۔ اتوار کوسینیٹ سیکرٹریٹ میڈیا ڈائریکٹوریٹ سے جاری بیان کے مطابق روس پہنچنے پر چیئرمین سینیٹ کا استقبال روسی فیڈریشن کونسل میں روس پاکستان فرینڈ شپ گروپ کے سربراہ مستقل شیزو ولادمیر نے کیا۔
چیئرمین سینٹ نے اس موقع پر پاکستان ٹیلی ویژن کو روس کے دورے سے متعلق انٹرویو بھی دیا۔چیئرمین سینیٹ نے کہا کہ روس کے ساتھ پاکستان کے پارلیمانی تعلقات بہت مضبوط ہیں،ہم ان تعلقات کو مزید مستحکم کرنے کے خواہاں ہیں۔ چیئرمین سینیٹ نے کہا کہ وفود کے تبادلوں میں تیزی دیکھنے میں آرہی ہے جو کہ ایک مثبت پیشرفت ہے۔
روس میں اپنے قیام کے دوران چیئرمین سینیٹ اعلی سطح ملاقاتیں کریں گے۔ملاقاتوں میں پارلیمانی تعاون کے فروغ ، خطے کی مجموعی صورتحال اور مختلف شعبوں میں معاونت ہے امکانات پر تبادلہ خیال کیا جائے گا۔
Short Link: https://urdu.app.com.pk/urdu/?p=595751
