اسلام آباد۔22مئی (اے پی پی):وفاقی وزیر اقتصادی امور احد چیمہ نے پاکستان کے ترقیاتی ایجنڈے کی تکمیل کے لیے عالمی بینک کی مسلسل حمایت کو سراہتے ہوئے کہاہے کہ عالمی بینک کو صوبوں میں سماجی تحفظ کے پروگراموں میں تعاون بڑھانا چاہیے، کلی معیشت کے پائیدار استحکام کیلئے جامع اقتصادی اصلاحات کاعمل جاری ہے۔ انہوں نے یہ بات جمعرات کویہاں عالمی بینک کی مینجنگ ڈائریکٹر آپریشنز اینا بئیر ڈی کی قیادت میں وفد سے اہم اور نتیجہ خیز ملاقات میں کہی۔ ملاقات میں فریقین کی جانب سے کنٹری شراکت داری فریم ورک کے تناظر میں ممکنہ شعبوں اور پہلے سے جاری مختلف منصوبوں کے آپریشنز بہتر بنانے کے لئے مختلف اقدامات پر تبادلہ خیال کیا گیا۔
وفاقی وزیر نے پاکستان کے ترقیاتی ایجنڈے کی تکمیل کے لیے عالمی بینک کی مسلسل حمایت کو سراہا۔ انہوں نے بینک کے کنٹری آفس کے تعاون بالخصوص سبکدوش ہونے والے کنٹری ڈائریکٹر ناجی بن حسائن کے کرادر کی تعریف کی۔ احد چیمہ نے کلی معیشیت کے استحکام کے حصول کے لئے جاری لیے جامع اقتصادی اصلاحات پر روشنی ڈالتے ہوئے کہا کہ مختصر عرصے میں حکومت پاکستان نے قابل ذکر معاشی اقدامات اٹھائے،ان غیر متزلزل کی کامیابی کا اندازہ اس بات سے لگایا جاسکتا ہے کہ آئی ایم ایف کا توسیعی فنڈسہولت (ای ای ایف) پروگرام کامیابی سے جاری ہے اور عالمی ایجنسی فچ کی جانب سے پاکستان کی کریڈٹ ریٹنگ میں اضافہ کیا گیا ہے۔
اینا بیئرڈی نے اس موقع پرکہاکہ عالمی بینک آئی ایم ایف کے ساتھ پروگرام کو کامیاب کرنے کے لئے حکومت پاکستان کی کاوشوں کو سراہتا ہے۔ انہوں نے پاکستان کیلئے عالمی بینک کے کنٹری پارٹنرشپ فریم ورک کو دیگر ممبر ممالک کے لئے ایک ماڈل قراردیتے ہوئے کہا کہ اس کو آگے بڑھانے میں وزیراعظم شہباز شریف اور وفاقی وزیر احد چیمہ قابل تعریف کرادر ادا کررہے ہیں۔ فریقین اس بات پر متفق ہیں کہ سی پی ایف پر عملدرآمد کے لئے جلد ہی ایک موثر حکمت عملی بنائے جائے گی تاکہ اس کے مثبت نتائج برآمد ہوں۔
وفاقی وزیر احد چیمہ نے ملاقات میں اس بات پر زور دیا کہ عالمی بینک صوبوں میں سماجی تحفظ کے پروگرامز میں بھی تعاون بڑھائے۔ توانائی شعبے کاحوالہ دیتے ہوئے انہوں نے کہا کہ عالمی بینک کی معاونت سے توانائی کے شعبے میں بہتری لانا چاہتے ہیں تاکہ عام عوام کو سستی بجلی مل سکے۔ ایم ڈی اینا بئیرڈی نے اہم شعبوں میں عالمی بینک کے تعاون اور تکنیکی مدد کی یقین دہانی کرائی۔
وفاقی وزیراور ایم ڈی نے اس بات پر اتفاق کیا کہ جاری منصوبوں میں نجی شعبہ کو مزید سازگار ماحول فراہم کرنے لے لئے تعاون جاری رکھیں گے۔ ملاقات کے اختتام پر فریقین نے مثبت نتائج پر مبنی شراکت داری کے لئے عزم کا اظہار کرتے ہوئے اعادہ کیا کہ پاکستانی عوام کو سہولیات مہیا کرنے میں وہ اپناکردار ادا کرتے رہیں گے۔
Short Link: https://urdu.app.com.pk/urdu/?p=600189
