لاہور۔23مئی (اے پی پی):لاہور ہائیکورٹ نے سموگ اور ماحولیاتی آلودگی کے تدارک کے حوالے سے دائر درخواستوں پر سماعت کرتے ہوئے پنجاب بھر کے سروس اسٹیشنز میں واٹر ری سائیکلنگ پلانٹ لگانے کا حکم دے دیا۔ عدالت نے پنجاب حکومت کو ہدایت جاری کی کہ پنجاب بھر کے ڈپٹی کمشنرز کو فوری عدالتی احکامات پر عملدرآمد کا پابند بنائیں۔
عدالت نے باور کرایا ہے کہ پانی کو محفوظ کرنے کے لیے ہمیں مزید اقدامات کرنا ہوں گے۔ عدالت نے متعلقہ محکموں سے رپورٹ طلب کرتے ہوئے کیس کی سماعت آئندہ جمعے تک ملتوی کر دی۔لاہور ہائیکورٹ کے جسٹس شاہد کریم نے سموگ کے تدارک کیس میں ہارون فاروق ، اظہر صدیق سمیت دیگر کی ایک ہی نوعیت کی دائر درخواستوں پر سماعت کی جس میں ماحولیاتی آلودگی اور سموگ کے تدارک کیلئے اقدامات نہ کرنے کی نشاندہی کی گئی۔ جمعہ کے روز دوران سماعت مختلف محکموں کے حکام پیش ہوئے اور عدالتی احکامات پر اپنی اپنی رپورٹس داخل کرائی ۔ دوران سماعت ضلع قصور کے واٹر ٹریٹمنٹ پلانٹ کو بحال کرنے کے حوالے سے رپورٹ عدالت پیش کی گئی۔ عدالت نے آئندہ سماعت پر کمشنر لاہور سے ٹریٹمنٹ پلانٹ سے متعلق رپورٹ طلب کرلی۔ جسٹس شاہد کریم نے ریمارکس دیے کہ قصور کا واٹر ٹریٹمنٹ پلانٹ بند ہونے سے بیماریاں پھیل رہی ہیں، اب واٹر ٹریٹمنٹ پلانٹ کو بحال کرنا ہوگا تاکہ ٹیریز کا پانی صاف ہو۔
عدالت میں رپورٹ پیش کی گئی کہ سی بی ڈی نے بارش کا پانی ذخیرہ کرنے کے لئے واٹر ٹینک بنایا ہے، سی بی ڈی کے بارش کے زخیرہ شدہ پانی کو روڑز کی صفائی اور پودوں کے لئے استعمال کیا جاسکے گا۔ جسٹس شاہد کریم نے ریمارکس دیے کہ سی بی ڈی کا یہ اچھا اقدام ہے۔
محکمہ ماحولیات کے وکیل نے عدالت کو آگاہ کیا کہ موٹر وے پر فصلوں کی باقیات جلانے کو روکنے کے لئے ای پی اے کی ٹیموں نے کام شروع کردیا ہے۔ موٹر وے والی سائیڈ پر جو باقیات جلائے گا اس کے چالان بھی کررہے ہیں۔ عدالت نے متعلقہ محکموں سے رپورٹ طلب کرلی ۔عدالت نے کیس کی مزید سماعت آئندہ جمعہ تک ملتوی کر دی۔
Short Link: https://urdu.app.com.pk/urdu/?p=600556
