واشنگٹن۔6جون (اے پی پی):پاکستان کے سفارتی مشن کے سربراہ اور چیئرمین پاکستان پیپلز پارٹی بلاول بھٹو زرداری نے امریکی کانگریس کی خارجہ امور کمیٹی کے چیئرمین برائن ماسٹ، رینکنگ ممبر گریگوری میکس، جنوبی و وسطی ایشیا سے متعلق ذیلی کمیٹی کے چیئرمین بل ہائزنگا اور سینئر کانگریس مین بریڈ شرمین سے ملاقات کی۔
یہ ملاقات جنوبی ایشیا میں امن و استحکام سے متعلق کھلے اور تعمیری تبادلہ خیال پر مبنی تھی۔ بلاول بھٹو زرداری نے بھارتی حکومت کی حالیہ اشتعال انگیزیوں پر پاکستان کے گہرے تحفظات کا اظہار کرتے ہوئے کہا کہ بالخصوص سندھ طاس معاہدے کو یکطرفہ طور پر معطل کرنا ایک خطرناک مثال اور بین الاقوامی قوانین کی سنگین خلاف ورزی ہے۔
انہوں نے مقبوضہ جموں و کشمیر میں بگڑتی ہوئی انسانی حقوق کی صورتحال پر بھی روشنی ڈالی اور کہا کہ دیرپا امن زبردستی یا دباؤ سے نہیں بلکہ صرف بامعنی مکالمے اور سفارتکاری سے حاصل کیا جا سکتا ہے۔ بلاول بھٹو زرداری نے امریکا کی جانب سے خطے میں کشیدگی کم کرنے کی کوششوں کو سراہا اور پاکستان کے علاقائی امن اور مسئلہ کشمیر کے منصفانہ حل کے عزم کا اعادہ کیا۔
