پشاور۔ 04 اگست (اے پی پی):وزیراعلیٰ خیبرپختونخوا کے معاونِ خصوصی برائے جنگلات، ماحولیات، جنگلی حیات و موسمیاتی تبدیلی پیر مصور خان نے سوات فارسٹ ڈویژن کالام میں درختوں کی غیر قانونی کٹائی سے روکنے پر محکمہ جنگلات کے فارسٹ گارڈ عزیزالحق پر ٹمبر مافیا کی جانب سے حملے کی شدید الفاظ میں مذمت کی ہے۔پیر مصور خان نے متعلقہ حکام کو ہدایت کی ہے کہ حملے میں ملوث عناصر کے خلاف مقدمہ درج کیا جائے اور انہیں فوری گرفتار کر کے قانون کے کٹہرے میں لا کھڑا کریں۔انہوں نے زخمی اہلکار کی جلد صحت یابی کے لیے دعا کی اور ان کے لئے نیک خواہشات کا اظہار کرتے ہوئے متعلقہ حکام کو ہسپتال میں زیر علاج فارسٹ گارڈ عزیزالحق کو بہترین طبی سہولیات فراہم کرنے کی بھی ہدایات جاری کیں۔
معاونِ خصوصی نے زخمی فارسٹ گارڈ کو جنگلات کے تحفظ کے لیے بہادری سے اپنے فرائض انجام دینے پر خراجِ تحسین پیش کیا اور کہا کہ ایسے اہلکار محکمے کا قیمتی اثاثہ ہیں۔انہوں نے محکمہ جنگلات کے افسران کو سختی سے ہدایت کی کہ ماحول دشمن عناصر کے خلاف بلا امتیاز کارروائی عمل میں لائی جائے تاکہ ان کا مکمل طور پر قلع قمع کیا جا سکے۔ بعد ازاں معاون خصوصی پیر مصور خان کی ہدایت پر چیف کنزرویٹر آف فارسٹ ملاکنڈ ریجن تھری اصغر خان نے ہسپتال میں زیر علاج زخمی فارسٹ گارڈ کی عیادت بھی کی واضح رہے کہ متعلقہ افسران نے فارسٹ گارڈ پر حملے میں ملوث تین ملزمان کے خلاف قانونی کارروائی کا آغاز کردیا ہے
