تاریخ میں پہلی بار، جاپان میں صحت جانچنے والے جدید لگژری بیت الخلا

ٹوکیو۔19جنوری (اے پی پی):جاپان میں صحت جانچنے والے جدید لگژری بیت الخلا متعارف کرا دیئے گئے ہیں ۔ العربیہ اردو کے مطابق جاپان کی وہ کمپنیاں جو لگژری ٹوائلٹس بنانے میں مہارت رکھتی ہیں اور اپنی جدید مصنوعات کے لیے مشہور ہیں، انہوں نے اپنی مصنوعات میں ایک نئی ٹیکنالوجی متعارف کرائی ہے جو پاخانے کا تجزیہ کر کے صارف کی صحت کی جانچ کرتی ہے، تاکہ وہ ایسے صارفین کو متوجہ کر سکیں جو اپنی صحت کے بارے میں محتاط ہیں۔کمپنی TOTO Ltd نے اگست میں اپنی لگژری ٹوائلٹس کی سیریز Neorest کے دو نئے ماڈلز لانچ کیے، جن میں ٹوائلٹ کے ٹب میں سینسر یونٹ نصب ہے، جو LED لائٹس والے آلے کے ذریعے پاخانے کی شکل، حجم اور رنگ کوسکین کرتا ہے۔

یہ مصنوعات جاپان میں گھریلو استعمال کے لیے اپنی نوعیت کی پہلی ہیں۔ اس نظام کے ذریعے پاخانے کی شکل اور سختی کو سات درجات میں تقسیم کیا جاتا ہے، جبکہ حجم اور رنگ کو تین سطحوں پر ریکارڈ کیا جاتا ہے۔صارفین اپنے فضلے کی حالت کو اس سمارٹ فون ایپ کے ذریعے بھی مانیٹر کر سکتے ہیں، یہاں تک کہ آنتوں کی حرکت کے تجزیے کی بنیاد پر غذائی مشورے بھی حاصل کر سکتے ہیں، جیسے سبزیوں کا زیادہ استعمال کرنے کی سفارش۔کمپنی کے ایک اہلکار نے بتایا کہ یہ نیا پراڈکٹ صارفین کی مدد کے لیے ڈیزائن کیا گیا ہے تاکہ وہ روزانہ کی بیت الخلاکی عادات کو بہتر صحت کے حصول کا دروازہ بنا سکیں۔