میلان کورٹینا سرمائی اولمپکس 2026کی رنگا رنگ افتتاحی تقریب 6فروری کو ہو گی، سکیورٹی کے سخت انتظامات ، 16کھیلوں کے116ایونٹس میں اڑھائی ہزار ایتھلیٹ شرکت کریں گے

روم۔3فروری (اے پی پی):میلان کورٹینا سرمائی اولمپکس گیمز2026کا آغاز رنگارنگ افتتاحی تقریب کے ساتھ 6فروری کو اٹلی میں ہوگا، رنگارنگ افتتاحی تقریب میلانو سان سیرو اولمپک سٹیڈیم میں ہوگی،جس میں اٹلی اور دنیا بھر سے سینکڑوں اعلیٰ شخصیات شرکت کریں گی۔میلان کورٹینا سرمائی اولمپکس گیمز2026کے مقابلے 22 فروری تک جاری رہیں گے۔

مختلف سپورٹس ویب سائٹس کی رپورٹ کے مطابق اٹلی کے صدر سرجیو مٹارلا افتتاحی تقریب میں شریک ہوں گے ان کے علاوہ انٹرنیشنل اولمپک کمیٹی (آئی او سی ) کی صدر کرسٹی کووینٹری عالمی اولمپک تحریک کی سربراہ، جو تقریب میں نمائندہ حیثیت سے شریک ہوں گی۔انٹرنیشنل اولمپک کمیٹی کے سابق صدر اور معزز رکن تھامس باخ جن کا اولمپکس میں طویل تعلق ہے اور وہ وی وی آئی پی مہمانان میں شامل ہیں۔فٹ بال کی عالمی تنظیم فیفا کے صدر جیانی انفنٹینو عالمی فٹبال کے سربراہ، جنہیں اس عالمی تقریب میں شرکت کے لیے مدعو کیا گیا ہے۔

مشہور اداکارہ و فلم سٹار مشیل ینگ عالمی کھیلوں اور ثقافتی شخصیات میں شامل، جو ریڈ کارپٹ تقریب میں نظر آئیں۔شاہی خاندان اور دیگر بین الاقوامی شخصیات جہاں کچھ روائتی شاہی شخصیات اور معروف عالمی شخصیات بھی اس تقریب میں شریک ہوں گے، جیسا کہ فلم سٹار ٹام کروز کی شرکت کی پیشگوئی بھی کی جارہی ہے۔افتتاحی تقریب میں صرف کھیل ہی نہیں بلکہ عالمی اور اطالوی مشہور فنکار بھی پرفارم کریں گے، جن میں ماریا کیری ، آندریا بوچیلّی ، لارا پاؤسینی ، پیرفرانچیسکو فاویانو اور سابرینا امپاکیاتی شامل ہیں، جو تقریب کو خصوصی رنگ و رونق بخشیں گے۔

ان شخصیات کی شرکت عالمی سطح پر اس تقریب کی اہمیت اور کشش کو بڑھاتی ہے، اور یہ اولمپکس کی شروعات کو نہ صرف کھیلوں بلکہ ثقافتی اور سفارتی سطح پر بھی ایک یادگار ایونٹ بنا دے گی۔میلان کورٹینا سرمائی اولمپکس گیمز2026کا کائونٹ ڈائون جاری ہے ،انتظار کی گھڑیاں ختم ہونے کو ہیں اور کھیلوں کے بڑے میلے کو سجنے میں 1 دن باقی رہ گیا ہے ۔ میلانو کورٹینا سرمائی اولمپکس گیمز 2026 پہلے اولمپک گیمز ہوں گے جن کی باضابطہ طور پر دو شہر مشترکہ میزبانی کریں گے۔ یہ تیسرے سرمائی اولمپکس، اور مجموعی طور پر چوتھے اولمپکس کی نشاندہی کریں گے، جس کی میزبانی اٹلی کرے گا۔اٹلی میں ہونے والے سرمائی اولمپکس 2026 کی تیاریاں عروج پر ہیں جو اپنے آخری مراحل میں داخل ہو چکی ہیں، جہاں دنیا بھر سے آنے والے ایتھلیٹس سرد موسم کے سب سے بڑے کھیلوں کے مقابلے میں شرکت کے لیے بے تاب ہیں۔

یہ عالمی ایونٹ 6 فروری 2026 سے شروع ہوگا اور 22 فروری 2026 تک جاری رہے گا، جس دوران دنیا کے بہترین کھلاڑی مختلف کھیلوں میں اپنی صلاحیتوں کا مظاہرہ کریں گے۔سرمائی اولمپکس 2026 کی میزبانی اٹلی کے دو مرکزی شہروں میلان اور کورٹینا ڈی امپیٹزو کو حاصل ہے، تاہم مقابلے صرف انہی شہروں تک محدود نہیں ہوں گے۔ اس کے علاوہ بورمیو، لیوگینو، پریڈازو، وال دی فیمے اور ویلتلینا جیسے علاقوں میں بھی مختلف مقابلے منعقد کیے جائیں گے۔ یہ اولمپکس جغرافیائی اعتبار سے اب تک کے سب سے زیادہ علاقوں میں پھیلے ہوئے سرمائی کھیل تصور کیے جا رہے ہیں، جس کے باعث ٹرانسپورٹ، رہائش اور لاجسٹکس کے لیے خصوصی انتظامات کیے گئے ہیں۔

ان کھیلوں میں دنیا کے تقریباً 90 سے زائد ممالک سے آنے والے لگ بھگ 3 ہزار ایتھلیٹ شرکت کریں گے، جو 16 مختلف کھیلوں میں 100 سے زائد میڈل ایونٹس میں حصہ لیں گے۔ فگر اسکیٹنگ، آئس ہاکی، الپائن اسکیئنگ، اسنو بورڈنگ، کراس کنٹری اسکیئنگ اور بایاتھلون جیسے کھیل شائقین کی خصوصی توجہ کا مرکز ہوں گے۔ کئی معروف اولمپک چیمپئنز کے ساتھ ساتھ نوجوان ایتھلیٹس بھی عالمی سطح پر خود کو منوانے کے لیے میدان میں اتریں گے۔

اولمپکس کی اوپننگ سرمنی 6 فروری کو میلان کے تاریخی سان سیرو اسٹیڈیم میں منعقد کی جائے گی، جہاں ہزاروں ایتھلیٹس اپنے اپنے ممالک کے پرچم تھامے پریڈ کریں گے۔ اس تقریب میں اٹلی کی ثقافت، تاریخ اور جدید فن کا امتزاج پیش کیا جائے گا، جبکہ امن، اتحاد اور عالمی بھائی چارے کا پیغام اجاگر کیا جائے گا۔ دنیا بھر میں کروڑوں ناظرین اس رنگا رنگ تقریب کو براہِ راست دیکھیں گے۔انتظامیہ کے مطابق اولمپکس کے دوران سکیورٹی کو یقینی بنانے کے لیے سخت اور جامع انتظامات کیے گئے ہیں۔

مقامی پولیس، قومی سکیورٹی اداروں اور بین الاقوامی تنظیموں کے باہمی تعاون سے تمام مقامات پر کڑی نگرانی رکھی جائے گی، جبکہ کھلاڑیوں اور شائقین کی سہولت کے لیے جدید ٹرانسپورٹ نظام اور رہائشی سہولیات فراہم کی جا رہی ہیں۔ ماحول دوست اولمپکس کے تصور کے تحت زیادہ تر مقامات پہلے سے موجود سپورٹس انفراسٹرکچر پر مشتمل ہیں تاکہ قدرتی وسائل کو کم سے کم نقصان پہنچے۔

سرمائی اولمپکس 2026 کی اختتامی تقریب 22 فروری کو تاریخی ورونا آرینا میں منعقد ہوگی، جہاں کھیلوں کے اس عظیم میلے کا شاندار اختتام کیا جائے گا۔ اس موقع پر کامیاب ایتھلیٹس کو خراجِ تحسین پیش کیا جائے گا اور اولمپک پرچم آئندہ میزبان ملک کے حوالے کیا جائے گا۔یوں میلان اور کورٹینا میں ہونے والے یہ سرمائی اولمپکس نہ صرف کھیلوں کا ایک بڑا عالمی مقابلہ ہوں گے بلکہ اٹلی کے لیے اپنی ثقافت، مہمان نوازی اور تنظیمی صلاحیتوں کو دنیا کے سامنے پیش کرنے کا ایک تاریخی موقع بھی ثابت ہوں گے۔