معاون خصوصی رانا احسان افضل خان کا اسلام آباد انٹرنیشنل ائیرپورٹ پر کمبوڈیا کی وزیر تجارت چام نیمول کا استقبال

اسلام آباد۔9فروری (اے پی پی):وزیر اعظم کے معاون خصوصی برائے تجارت رانا احسان افضل خان نے پیر کو اسلام آباد انٹرنیشنل ائیرپورٹ کے سٹیٹ لاؤنج میں کمبوڈیا کی وزیر تجارت چام نیمول کا استقبال کیا۔ایک اعلیٰ سرکاری وفد کے ہمراہ چام نیمول پاکستان کمبوڈیا جوائنٹ ٹریڈ کمیٹی 10 سے 11 فروری 2026 میں شرکت کے لیے پاکستان پہنچی ہیں۔ جے ٹی سی کا افتتاحی اجلاس 21 جنوری 2025 کو نوم پنہ میں منعقد ہوا جس کی قیادت وفاقی وزیر تجارت جام کمال خان نے کی۔

جے ٹی سی دو طرفہ تجارت، سرمایہ کاری اور اقتصادی تعاون کو آگے بڑھانے کے لیے بنیادی پلیٹ فارم کے طور پر کام کرتا ہے۔پاکستان اور کمبوڈیا کے درمیان سفارتی تعلقات کو 28 مئی 1952 کو باضابطہ شکل دی گئی، پاکستان فرانسیسی نوآبادیاتی حکمرانی سے کمبوڈیا کی آزادی کو تسلیم کرنے والے پہلے ممالک میں شامل تھا۔ اگرچہ دوطرفہ تجارت کا حجم معمولی رہتا ہے، پاکستان کو مسلسل سرپلس حاصل ہے۔

مالی سال 2024-25 میں پاکستان نے 4.70 ملین امریکی ڈالر کی درآمدات کے مقابلے کمبوڈیا کو 29.2 ملین امریکی ڈالر کی اشیاء برآمد کیں، جس سے 24.5 ملین امریکی ڈالر کا تجارتی توازن حاصل ہوا، اہم پاکستانی برآمدات میں ادویات ، بنے ہوئے سوتی کپڑے ، سوتی دھاگے اور چمڑے کی تیار مصنوعات شامل ہیں۔

پہلی جے ٹی سی نے ترجیحی تجارتی معاہدے (پی ٹی اے) پر بات چیت کے ساتھ تجارتی سہولت، سرمایہ کاری، زراعت، ٹیکسٹائل، کسٹم اور متعلقہ شعبوں میں تعاون کا جائزہ لیا۔ اس دورے میں پی ٹی اے مذاکرات کے آغاز کا باضابطہ اعلان کیا جائے گا، جو ٹیرف کو کم کرنے، مارکیٹ تک رسائی کو بہتر بنانے، تجارتی حجم کو بڑھانے اور مشترکہ منصوبوں کو فروغ دینے کے لیے ڈیزائن کیا گیا ہے۔

یہ مصروفیت آسیان کے وسیع تر انضمام کی کوششوں کے درمیان آسیان کے اراکین کے ساتھ دو طرفہ تعلقات استوار کرنے کی پاکستان کی حکمت عملی کی حمایت کرتی ہے۔ حکومت پاکستان کمبوڈیا کے ساتھ اقتصادی تعلقات کو بلند کرنے، پائیدار ترقی کو فروغ دینے اور تجارتی اور سرمایہ کاری کے بڑھتے ہوئے روابط کے ذریعے باہمی فوائد کو کھولنے کے لیے پرعزم ہے۔