چین ویتنام اسٹریٹجک ڈائیلاگ میکانزم کا پہلا وزارتی اجلاس، مشترکہ راستے پر آگے بڑھنے، مشترکہ تصورات کو فروغ دینے اور مشترکہ چیلنجز کا مقابلہ کرنے پر اتفاق

بیجنگ۔18مارچ (اے پی پی):چین کے وزیر خارجہ وانگ ای نے کہا ہے کہ چین ویتنام ’’3 +3‘‘ اسٹریٹجک ڈائیلاگ میکانزم کے پہلے وزارتی اجلاس میں فریقین نے مشترکہ راستے پر آگے بڑھنے، مشترکہ تصورات کو فروغ دینے، مشترکہ چیلنجز کا مقابلہ کرنے اور مشترکہ کارروائی کرنے پر اتفاق کیا ہے۔ سی جی ٹی این کے مطابق کمیونسٹ پارٹی آف چائنا کی مرکزی کمیٹی کے سیاسی بیورو کے رکن اور چینی وزیر خارجہ وانگ ای نے ہنوئی میں چین-ویتنام سفارت، دفاع اور پبلک سکیورٹی کے ’’3+ 3‘‘ اسٹریٹجک ڈائیلاگ میکانزم کے پہلے وزارتی اجلاس میں شرکت اور دو طرفہ تعاون گائیڈنس کمیٹی کی 17ویں میٹنگ کی صدارت کے بعد چینی میڈیا سے گفتگو کی۔

وانگ ای نے کہا کہ ’’3 +3‘‘ اسٹریٹجک ڈائیلاگ میکانزم کی وزارتی سطح کی میٹنگ چین اور ویتنام کے درمیان عالمی سطح پر اپنی نوعیت کا پہلا اسٹریٹجک بات چیت کا پلیٹ فارم ہے۔ پہلی میٹنگ میں فریقین نے مشترکہ راستے پر آگے بڑھنے، مشترکہ تصورات کو فروغ دینے، مشترکہ چیلنجز کا مقابلہ کرنے اور مشترکہ کارروائی کرنے پر اتفاق رائے حاصل کیا۔ دونوں نے بڑے فیصلوں پر بات چیت اور تعاون کو مضبوط کرنے، صدر شی جن پنگ کے چار گلوبل انیشی ایٹوز کے نفاذ کو آگے بڑھانے، اقوام متحدہ کی مرکزیت پر مبنی بین الاقوامی نظام اور بین الاقوامی قانون کی بنیاد پر بین الاقوامی ترتیب کو مضبوطی سے برقرار رکھنے اور بالادستی اور طاقت کی سیاست اور یکطرفہ پالیسیوں کی مخالفت کرنے پر اتفاق کیا۔

چین اور ویتنام کے وزرائے خارجہ نے اسٹریٹجک بات چیت کی اور دونوں ممالک کی پبلک سکیورٹی کی وزارتوں نے دہشت گردی کے خلاف تعاون کی متعدد دستاویزات پر دستخط کیے۔ اس کے علاوہ دونوں ممالک کی افواج بحری جہازوں کے مشترکہ گشت اور مشترکہ تربیتی مشقوں سمیت مختلف سرگرمیوں کا انعقاد کریں گی۔ فریقین نے اس بات پر اتفاق کیا کہ ’’3 +3‘‘ اسٹریٹجک ڈائیلاگ میکانزم کا دوسرا وزارتی سطح کا اجلاس مناسب وقت پر چین میں منعقد کیا جائے گا۔