ایگزیکٹو ڈائریکٹر آئی بی سی سی ڈاکٹر غلام علی ملّاح کافیڈرل بورڈ کے امتحانی مرکز کا دورہ

اسلام آباد۔31مارچ (اے پی پی):ایگزیکٹو ڈائریکٹر انٹر بورڈز کوآرڈینیشن کمیشن (آئی بی سی سی )ڈاکٹر غلام علی ملّاح نے فیڈرل بورڈ آف انٹرمیڈیٹ اینڈ سیکنڈری ایجوکیشن (ایف بی آئی ایس ای ) کے زیرِ اہتمام ہونے والے سیکنڈری سکول سرٹیفکیٹ (ایس ایس سی ) امتحانات کے پہلے روز اسلام آباد کے آئی ایم سی جی ایف ٹین ٹو میں قائم امتحانی مرکز کا دورہ کیا۔ یہ امتحانات 4 مئی 2026 تک جاری رہیں گے۔دورے کے دوران ڈاکٹر غلام علی ملّاح نے امتحانی انتظامات کا تفصیلی جائزہ لیا اور شفافیت، انصاف اور امتحانات کے ہموار انعقاد کو یقینی بنانے کے لئےفیڈرل بورڈ کی جانب سے کئے گئے مؤثر اقدامات پر اطمینان کا اظہار کیا۔

انہوں نے خصوصاً سکول انتظامیہ کی جانب سے منظم نشستوں کے انتظام، عملے کی اعلیٰ سطح کی تیاری اور حقیقی وقت کی نگرانی و رپورٹنگ کے لئے ایف بی آئی ایس ای کے تیار کردہ جدید سافٹ ویئر کے استعمال کو سراہا۔انہوں نے امتحانی مرکز کے بہترین ماحول کی بھی تعریف کی جس میں مناسب روشنی، صفائی اور نظم و ضبط شامل تھے۔ انہوں نے اس بات پر بھی اطمینان کا اظہار کیا کہ طلبہ امتحانی نظام سے مطمئن اور پُراعتماد نظر آئے جو جدید تقاضوں کے مطابق مختلف ذہنی سطحوں پر جانچ کو یقینی بناتا ہے۔ڈاکٹر غلام علی ملّاح نے ملک بھر میں شفاف، ٹیکنالوجی پر مبنی اور تصوراتی بنیادوں پر قائم امتحانی نظام کے فروغ کے لئے آئی بی سی سی کے عزم کا اعادہ کیا تاکہ پاکستان کے تعلیمی شعبے میں معیار اور اعتماد کو مزید مضبوط بنایا جا سکے۔