راولپنڈی ڈویژن باسکٹ بال ٹیم کے ٹرائلز مکمل، کمشنر کپ کے لئے سکواڈ کا اعلان

اسلام آباد۔17جولائی (اے پی پی):راولپنڈی ڈویژن باسکٹ بال ایسوسی ایشن کے زیر اہتمام کمشنر کپ باسکٹ بال چیمپئن شپ کے لئے دو روزہ ٹرائلز منعقد ہوئے۔ ٹرائلز کی نگرانی سلیکشن کمیٹی نے کی جبکہ قومی باسکٹ بال کوچ ملک محمد ریاض اور باسکٹ بال کے شائقین کی بڑی تعداد بھی اس موقع پر موجود تھی۔ٹرائلز کے اختتام پر کمشنر کپ کے لئے راولپنڈی ڈویژن کے 16 رکنی سکواڈ کا اعلان کیا گیا۔ منتخب کھلاڑیوں میں حماد، حمزہ، ذیشان، نور الزمان، شیراز، محید، بلال، عدنان، محمد خبیب، نین شاہ، یزدان، حسیب، حیدر، ایان عباسی، عمران اور ذکاء اللہ شامل ہیں۔

راولپنڈی ڈویژن باسکٹ بال ایسوسی ایشن کے صدر امتیاز رفیع بٹ نے میڈیا سے گفتگو کرتے ہوئے بتایا کہ منتخب کھلاڑیوں کا تربیتی کیمپ راولپنڈی میں لگایا گیا ہے جو ٹیم کی فیصل آباد روانگی تک جاری رہے گا۔ کیمپ میں کوچز کھلاڑیوں کو جدید خطوط پر تربیت فراہم کریں گے۔ تمام منتخب کھلاڑیوں کو فوری طور پر تربیتی کیمپ میں رپورٹ کرنے کی ہدایت کی گئی ہے جو کہ شروع ہو گیا ہے۔امتیازبٹ نے مزید کہا کہ کمشنر کپ باسکٹ بال چیمپئن شپ 24 سے 28 جولائی 2026 تک فیصل آباد میں منعقد ہوگی جس میں پنجاب بھر کی ڈویژنل ٹیمیں ٹائٹل کے حصول کے لئے ایک دوسرے کے مدمقابل ہوں گی۔

انہوں نے کہا کہ اس ایونٹ کا مقصد صوبے بھر میں باسکٹ بال کے کھیل کو فروغ دینا، بین الاضلاعی مقابلوں کو مزید مضبوط بنانا اور نوجوان کھلاڑیوں کو اپنی صلاحیتوں کے اظہار کے بہترین مواقع فراہم کرنا ہے۔ انہوں نے کہا کہ ایسی سرگرمیاں نہ صرف نئے ٹیلنٹ کو سامنے لانے میں مددگار ثابت ہوں گی بلکہ پنجاب میں باسکٹ بال کے معیار کو بھی مزید بلند کریں گی۔