پاکستان اور امریکا کے درمیان کاروباری و سرمایہ کاری تعاون کا نیا باب، معروف امریکی سرمایہ کاروں، کاروباری شخصیات اور ٹیکنالوجی ماہرین کا40 رکنی وفد کا دورہ پاکستان

اسلام آباد۔27جولائی (اے پی پی):پاکستان اور امریکا کے درمیان کاروباری و سرمایہ کاری تعاون کا نیا باب شروع ہوگیا ہے ، معروف امریکی سرمایہ کاروں، کاروباری شخصیات اور ٹیکنالوجی ماہرین کا40 رکنی وفد 26 سے 31 جولائی تک پاکستان کا دورہ کر رہا ہے ۔

تفصیلات کے مطابق خصوصی سرمایہ کاری سہولت کونسل (ایس آئی ایف سی )کی مؤثر سہولت کاری سے پاکستان میں غیر ملکی سرمایہ کاری اور بین الاقوامی کاروباری روابط کو نئی رفتار مل رہی ہے،ایس آئی ایف سی، وزارتِ تجارت اور پاکستانی سفارتخانے نے بی ٹو بی ملاقاتوں، نیٹ ورکنگ سیشنز اور پالیسی بریفنگز کا جامع پروگرام ترتیب دیا ہے، وفد کی وزیراعظم، نائب وزیراعظم و وزیر خارجہ اور ایس آئی ایف سی حکام سے ملاقاتیں متوقع ہیں، ملاقاتوں میں سرمایہ کاری، کاروباری تعاون اور نئے اقتصادی مواقع پر تبادلۂ خیال کیا جائے گا، دورے کے دوران وزارتِ تجارت، چیمبر آف کامرس اینڈ انڈسٹری اور دیگر کاروباری و صنعتی اداروں سے بھی ملاقاتیں ہوں گی، وزارتِ آئی ٹی کے زیر اہتمام پی ایس ای بی، پاشا، نیشنل انکیوبیشن سینٹر اور ٹیکنالوجی اسٹارٹ اپس کے اشتراک سے آئی ٹی شعبے پر خصوصی بریفنگ ہوگی، امریکی وفد دفاع، ایرو اسپیس، خلائی ٹیکنالوجی، آئی ٹی، توانائی، صحت، معدنیات اور انفراسٹرکچر میں سرمایہ کاری کے مواقع کا جائزہ لے گا، وفد کے ارکان مشترکہ منصوبوں، اے آئی، ٹیلی میڈیسن، معدنیات اور ڈیجیٹل انفراسٹرکچر میں سرمایہ کاری میں دلچسپی رکھتے ہیں، یہ دورہ پاک–امریکا اقتصادی تعلقات، غیر ملکی سرمایہ کاری، نجی شعبے کے تعاون اور کاروباری روابط کو مزید مضبوط بنانے میں اہم کردار ادا کرے گا۔