شہید بینظیرآباد میں انٹر سکول بوائز ہاکی چیمپئن شپ 2026 کا آغاز کل ہوگا

حیدرآباد۔ 04 اکتوبر (اے پی پی):ڈسٹرکٹ ہاکی ایسوسی ایشن شہید بینظیرآباد کی جانب سے ڈسٹرکٹ سپورٹس آفس اور محکمہ تعلیم شہید بینظیرآباد کے تعاون سے ضلع شہید بینظیرآباد میں ہاکی کے فروغ اور سکول سطح پر نئے ٹیلنٹ کو سامنے لانے کے لیے انٹر سکول (بوائز) ہاکی چیمپئن شپ 2026 کا آغاز 5 اکتوبر 2026سے شہید محترمہ بینظیر بھٹو ہاکی سٹیڈیم نوابشاہ میں ہوگا۔ چیمپئن شپ میں نوابشاہ کے مختلف سکولوں کی 8 ٹیمیں دو پولز میں حصہ لے رہی ہیں۔ پول اے میں GBHS نیو سوسائٹی، GBHS نیا مدرسہ، GBHS لائن پار اور گورنمنٹ MPL ہائی سکول شامل ہیں، جبکہ پول بی میں GBHS افضل شاہ، GDCHS HM خواجہ (نمبر 1)، GBHS شاہ ولی اللہ اور GBHS مسلم سکول شامل ہیں۔

شیڈول کے مطابق پہلے مرحلے کے میچز 5 سے 10 اکتوبر تک روزانہ صبح کھیلے جائیں گے۔ سیمی فائنلز 12 اکتوبر کو جبکہ فائنل 13 اکتوبر 2026 کو شام 4 بجے شہید محترمہ بینظیر بھٹو ہاکی سٹیڈیم نوابشاہ میں کھیلا جائے گا۔ منتظمین کے مطابق تمام ٹیمیں پاکستان ہاکی فیڈریشن کی ہدایات پر سختی سے عمل کریں گی۔

سکول سطح پر ہاکی کے ایسے مقابلوں کا مقصد نوجوان کھلاڑیوں کو اپنی صلاحیتوں کے اظہار کے مواقع فراہم کرنا اور مستقبل کے باصلاحیت ہاکی کھلاڑیوں کی حوصلہ افزائی کرنا ہے۔ پاکستان ہاکی فیڈریشن بھی سکول ہاکی کے فروغ اور گراؤنڈ لیول سے ٹیلنٹ سامنے لانے کے لیے ملک بھر میں پروگرامز جاری رکھے ہوئے ہے۔