آرسنل کی ای پی ایل سیزن میں چھٹی فتح، برائٹن نے کرسٹل پیلس کو 0-5 سے روند دیا

لندن۔19اکتوبر (اے پی پی):انگلش پریمیئر لیگ میں دفاعی چیمپئن آرسنل نے ناٹنگھم فاریسٹ کو 0-1 سے شکست دے کر ٹائٹل کی دوڑ میں اپنی پوزیشن مستحکم کر لی جبکہ برائٹن اینڈ ہوو البیون نے کرسٹل پیلس کو 0-5 سے عبرتناک شکست دے دی۔ مانچسٹر یونائیٹڈ اور لیڈز یونائیٹڈ کا مقابلہ 1-1 سے برابر رہا جبکہ بورن ماؤتھ نے سنڈرلینڈ کو 0-2 سے ہرا کر لیگ میں اپنی پہلی فتح حاصل کر لی۔ای ایس پی این کے مطابق دفاعی چیمپئن آرسنل کی جانب سے نونی مادوئیکے نے 80ویں منٹ میں فیصلہ کن گول کیا۔

ان کا شاٹ حریف کھلاڑی سے ٹکرا کر جال میں چلا گیا۔ آرسنل نے 70 فیصد سے زائد وقت گیند اپنے قبضے میں رکھی، تاہم ٹیم پورے میچ میں صرف ایک مرتبہ گیند کو نشانے پر مار سکی۔ اس فتح کے بعد آرسنل کے 21 ممکنہ پوائنٹس میں سے 18 ہو گئے ہیں اور وہ سرفہرست مانچسٹر سٹی سے 3 پوائنٹس پیچھے ہے۔ایک اور میچ میں برائٹن اینڈ ہوو البیون نے کرسٹل پیلس کے خلاف میچ کے ابتدائی 10 منٹ میں 3 گول کر کے حریف ٹیم کو سنبھلنے کا موقع نہ دیا۔ چوتھے منٹ میں جے ڈی کینوٹ کے اپنے ہی گول نے برائٹن اینڈ ہوو البیون کو برتری دلائی جبکہ 7ویں منٹ میں ڈیاگو گومیز نے تقریباً 50 میٹر کے فاصلے سے شاندار گول کر دیا۔ یاسین ایاری نے 10ویں منٹ میں تیسرا گول کیا۔

دوسرے ہاف میں چارالمپوس کوسٹولاس نے چوتھا اور جیک ہنشل ووڈ نے پانچواں گول کر کے برائٹن اینڈ ہوو البیون کی بڑی کامیابی یقینی بنا دی۔ادھر لیڈز یونائیٹڈ اور مانچسٹر یونائیٹڈ کے درمیان سخت مقابلہ 1-1 سے برابر رہا۔ مانچسٹر یونائیٹڈ کے برائن مبیومو نے اپنی ٹیم کو برتری دلائی، تاہم لیڈز کے ڈومینک کالورٹ لیون نے 51ویں منٹ میں گول کر کے مقابلہ برابر کر دیا۔دوسری جانب بورن ماؤتھ نے مارکس ٹاورنیئر اور ایوانیلسن کے گولز کی بدولت سنڈرلینڈ کو 0-2 سے شکست دی اور لیگ میں اپنی پہلی فتح حاصل کر لی۔ اس نتیجے کے بعد سنڈرلینڈ پوائنٹس ٹیبل پر دوسرے آخری نمبر پر چلا گیا ہے۔