اسلام آباد۔29مارچ (اے پی پی):آل پاکستان رمضان کپ باسکٹ بال ٹورنامنٹ کے مقابلے اسلام آباد میں جاری ہیں۔ وویمنز کیٹگری میں آرمی جبکہ مینز ڈیپارٹمنٹل مقابلوں میں واپڈا اور نیوی نے کامیابیاں حاصل کرلیں ۔ فیڈرل باسکٹ بال ایسوسی ایشن کے سیکرٹری اوج ظہور کے مطابق پاکستان سپورٹس بورڈ کے تعاون سے پاکستان باسکٹ بال فیڈریشن ک سرپرستی میں پاکستان سپورٹس کمپلیکس میں منعقدہ ایونٹ کے پہلے روز خواتین کے مقابلوں میں آرمی نے اے کے وائٹ کے خلاف شاندار کھیل کی بدولت 3-16پوائنٹس سے کامیابی حاصل کی ۔
آرمی کی آمنہ محسن نے 6اور ایمن ریاض نے چار پوائنٹس سکو ر کئے ۔ دوسرے میچ میں لائیکنز اے نےفرحانہ ناز کے پانچ اور فریحہ مشتاق کے تین پوائنٹس کی بدولت لائیکنز جونیئرز کے خلاف 2-11پوائنٹس سے کامیابی حاصل کی جبکہ تیسرے میچ میں لائیکنز بی نے اے کے پرپل کو 2-6پوائنٹس شکست دی۔مینز ڈیپارٹمنٹل مقابلوں میں واپڈا گرین نے آرمی بلیو کے خلاف 11-21پوائنٹس سے کامیابی حاصل کی ۔ واپڈا کے زین الحسن نے 11، زاہد عارف نے 5پوائنٹ سکور کئے۔
