لاہور۔22فروری (اے پی پی):آئی سی سی چیمپئنز ٹرافی کا قذافی اسٹیڈیم لاہور میں پہلا ٹاکرا ہفتے کے روز منعقد ہوا جس میں روایتی حریف آسٹریلیا اور انگلینڈ مد مقابل ہوئے۔ترجمان کے مطابق انسپکٹر جنرل پولیس ڈاکٹر عثمان انور کی ہدایت پر پنجاب پولیس ہائی الرٹ رہی، کھلاڑیوں، آفیشلز اور شائقین کرکٹ کو بھرپور سیکیورٹی فراہم کی گئی۔ آئی جی پنجاب نے ہدایت کی کہ انٹرنیشنل کرکٹ ایونٹ کی سیکیورٹی کے پیش نظر ملک دشمن عناصر پر کڑی نظر رکھیں، پرامن اور محفوظ ماحول میں انٹرنیشنل میچز کا انعقاد یقینی بنانے کے لئے کوئی کسر نہ اٹھا رکھی جائے ۔
ڈاکٹر عثمان انور نے کہا کہ پاکستان کرکٹ بورڈ، ضلعی انتظامیہ اور سیکیورٹی ایجنسیز سمیت تمام اداروں سے لمحہ بہ لمحہ کوآرڈینیشن یقینی بنایا جائے۔ ترجمان پنجاب پولیس نے بتایا کہ آسٹریلیا اور انگلینڈ کے میچ کی سیکیورٹی پر 12ہزار سے زائد پولیس افسران و اہلکار تعینات جبکہ کھلاڑیوں کی رہائش گاہ، روٹس، اسٹیڈیم اور اردگرد کی بلند عمارات پر سنائیپرز تعینات کیے گئے، ڈولفن سکواڈ، پولیس ریسپانس یونٹ اور ایلیٹ ٹیمیں روٹس و اہم مقامات کے گرد موثر پٹرولنگ کرتی رہیں جبکہ سیف سٹیز کیمروں کی مدد سے بھی ٹیموں کے روٹس اور اسٹیڈیم سمیت اہم مقامات کی مسلسل مانیٹرنگ کی گئی، ٹریفک کا بلاتعطل بہائو اور مناسب پارکنگ یقینی بنانے کیلئے اضافی ٹریفک وارڈنز تعینات کئے گئے۔
آئی جی پنجاب نے ہدایت کی کہ کھلاڑیوں کی رہائش گاہ، روٹس، اسٹیڈیم کے اطراف سرچ، سویپ، کومبنگ و انٹیلی جنس بیسڈ آپریشنز جاری رکھیں، اسٹیڈیم کے داخلی و خارجی راستوں اور انٹری گیٹس پر سکیورٹی پر تعینات فورس شہریوں کے ساتھ خوش اخلاقی سے پیش آئیں ۔ انہوں نے کہا کہ شائقین محفوظ ماحول میں انٹرنیشنل کرکٹ سے لطف اندوز ہونے کے لئے پنجاب پولیس سے تعاون کریں۔
Short Link: https://urdu.app.com.pk/urdu/?p=564863
