اسلام آباد۔26اگست (اے پی پی):قومی ویژن کے مطابق ملک میں کیش لیس معیشت کو فروغ دینے اور پاکستان کے ڈیجیٹل ادائیگی کے نظام کو مضبوط بنانے کے لیےسیکیورٹیز اینڈ ایکسچینج کمیشن آف پاکستان (ایس ای سی پی) نے ایک ہدایت جاری کی ہے جس کے تحت اس کے تمام لائسنس یافتہ اداروں کو اپنے کاروباری مقامات پر ڈیجیٹل ادائیگی کے حل بالخصوص راست کیو آر کوڈ کو اپنانے اور نمایاں طور پر آویزاں کرنے کا پابند کیا گیا ہے۔اس ہدایت کے ذریعے ایس ای سی پی کے زیر انتظام تمام ادارے جن میں نان-بینکنگ فنانس کمپنیاں، انشورنس کمپنیاں، مداربہ، سکیورٹیز بروکرز اور دیگر لائسنس یافتہ مارکیٹ انٹرمیڈیریز شامل ہیں، ڈیجیٹل ادائیگی کے حل نافذ کریں گے،
انہیں اپنے کاروباری مقامات پر نمایاں طور پر آویزاں کریں گے اور ڈیجیٹل طریقے سے ادائیگی کرنے والے صارفین کو انکار نہیں کر سکیں گے۔ اس ہدایت پر عمل درآمد 31 اکتوبر 2025ء تک یقینی بنایا جائے گا۔ایس ای سی پی، سٹیٹ بینک آف پاکستان کی ڈیجیٹلائزیشن کی مہم کے ساتھ مکمل طور پر ہم آہنگ ہے۔ یہ اقدام نہ صرف مالی شمولیت کو بڑھائے گا بلکہ ریگولیٹڈ سیکٹرز میں شفافیت، سہولت اور کاروباری کارکردگی کو بھی بہتر بنائے گا۔ تمام متعلقہ فریقین کی حوصلہ افزائی کی جاتی ہے کہ وہ اپنے متعلقہ بینکوں/ایم ایف بی/ای ایم آئی کے ساتھ فعال طور پر تعاون کریں تاکہ اپنے مفت راست کیو آر کوڈز حاصل کر سکیں اور وقت پر اس پر عمل درآمد کو یقینی بنائیں۔
