اسلام آباد۔25دسمبر (اے پی پی):وزیراعظم کے معاونِ خصوصی برائے صحت ڈاکٹر فیصل سلطان نے کہا ہے کہ برطانیہ میں سامنے آنے والی کورونا کی نئی قسم پاکستان کے پہنچنے کے کوئی شواہد نہیں ملے۔اپنے ایک انٹرویو میں انہوں نے کہا کہ ڈاکٹر عطا الرحمان نے وائرس پاکستان پہنچنےکاسائنسی ثبوت نہیں دیا،کورونا کی نئی قسم کو تلاش کرنے کی تحقیق کررہے ہیں۔برطانیہ میں آنے والی کورونا کی نئی قسم کے حوالے سے معاونِ خصوصی کا کہنا تھا کہ پاکستان میں نئے وائرس کی موجودگی کے حوالے سے تحقیقات جاری ہیں مگر اس کا ابھی تک کوئی ثبوت نہیں ملا۔ڈاکٹر فیصل سلطان نے کہا کہ میرا تخمینہ ہےوقت کے ساتھ ساتھ وبا بھی ختم ہوجائے گی ممکن ہے2021میں وباختم ہوجائے یا پھر اس سے زیادہ وقت لگے۔اُنہوں نے کہا کہ ویکسین آنے کے بعد وائرس کا وقت اور شدت کمزور ہونا بہت اہم ہے، ملک میں ایک سےزیادہ ویکسینز کی کوششیں کی جارہی ہیں۔
