انقرہ۔ 12 اگست (اے پی پی) ترکی کے3 فوجی اتاشی جن میں سے 2 یونان اور1 بوسنیا میں موجود ترک سفارت خانوں میں تعینات تھے، غائب ہو گئے ہیں۔ 1 ترک سینیئر اہلکار کے مطابق یہ تینوں ملٹری اتاشی انقرہ کی طرف سے انہیں واپس طلب کیے جانے کے بعد غائب ہوئے۔ خبر رساں ادارے روئٹرز کے مطابق اس سینیئر اہلکار نے نام ظاہر نہ کرنے کی شرط پر بتایا کہ انٹیلیجنس ذرائع سے یہ بات ثابت ہوئی ہے کہ یہ ملٹری اتاشی اٹلی فرار ہوئے ہیں اور اس حوالے سے اطالوی حکام کو آگاہ کیا جائے گا۔ ترکی میں گزشتہ ماہ کی ناکام فوجی بغاوت کے بعد سینیئر فوجی افسران سمیت ہزاروں گرفتاریاں کی جا چکی ہیں۔
