حکومت کی مسلسل کوششوں اور سخت فیصلوں سے ملکی معیشت بحالی کی طرف گامزن ہے،انجینئر امیر مقام

اسلام آباد۔22فروری (اے پی پی):وفاقی وزیر برائے امور کشمیر و گلگت بلتستان و سیفران انجینئر امیر مقام نے کہا ہے کہ حکومت کی مسلسل کوششوں اور سخت فیصلوں سے ملکی معیشت بحالی کی طرف گامزن ہے،وزیراعظم محمد شہباز شریف کے بروقت فیصلوں سے ملکی معیشت کے تمام اعشارئیے مثبت ہیں،مہنگائی کی شرح 38 فیصد سے کم ہو کر 4فیصدپر آ چکی ہے،وزیراعظم نے خصوصی ہدایت کی ہے کہ سرکاری ملازمین کو زیادہ سے زیادہ ریلیف پہنچایا جائے۔ان خیالات کا اظہار انہوں نے ہفتہ کو یہاں آل پاکستان گورنمنٹ ایمپلائز کنفیڈریشن کے منتخب عہدے داروں کی تقریب حلف برداری سے خطاب کرتے ہوئے کیا۔وفاقی وزیر نے کہا کہ نو منتخب عہدیداروں کو مبارکباد باد پیش کرتا ہوں،امید ہے کہ آپ پاکستان بھر کے سرکاری ملازمین کی فلاح و بہبود اور ان کے حقوق کے تحفظ کے لیے کام کریں گے۔

انہوں نے کہاکہ موجودہ حکومت کی مسلسل کوششوں اور سخت فیصلوں سے ملکی معیشت بحالی کی طرف گامزن ہے، دو سال پہلے ہرروز ملک کے دیوالیہ ہونے کی بات ہوتی تھی،حکومت کے بعض سخت فیصلوں کا بوجھ سرکاری ملازمین پر بھی پڑا،اگر پاکستان ڈیفالٹ کر جاتا تو سرکاری ملازمین سمیت ہر طبقے کو ناقابل تلافی نقصان پہنچتا۔وفاقی وزیر نے کہا کہ وزیراعظم شہباز شریف کے بروقت فیصلوں سے ملکی معیشت کے تمام اعشارئیے مثبت ہیں،مہنگائی کی شرح 38 فیصد سے کم ہو کر 4فیصدپر آ چکی ہے،بہتر پالیسیوں سے زرمبادلہ کے ذخائر میں اضافہ ہو رہا ہے، برآمدات اور بیرون ملک سے ترسیلات زر میں اضافہ ہورہا ہے۔وفاقی وزیر نے کہا کہ وزیراعظم کو تنخواہ دار طبقے پر ٹیکسوں کے بوجھ کا بخوبی اندازہ ہے،

وزیراعظم محمد شہباز شریف اپنی معاشی ٹیم کے ساتھ تنخواہ دار طبقے پر ٹیکس کی شرح کم کرنے میں کوشاں ہیں۔انہوں نے کہاکہ حکومت کی کوشش ہے کہ سرکاری ملازمین کے تمام مطالبات پورے ہوں ،ہمیں اپنے وسائل اور بین الاقوامی اداروں کے ساتھ کیے گئے معاہدوں کی بھی پاسداری کرنی ہے۔امیر مقام نے کہا کہ وزیراعظم نے خصوصی ہدایت کی ہے کہ سرکاری ملازمین کو زیادہ سے زیادہ ریلیف پہنچایا جائے،رانا ثنا اللہ کی سربراہی میں بنائی گئی کمیٹی نے سرکاری ملازمین کو آئندہ آنے والے بجٹ میں زیادہ سے زیادہ ریلیف دینے پر بھی کام ہو رہا ہے، مسائل کے حل کے لیے قابل عمل تجاویز پر فوری عمل درآمد کیا جا رہا ہے۔

انہوں نے کہا کہ میں حکومت کی طرف سے آ پ کو یقین دلاتا ہوں کہ حکومت کسان ،تاجر، مزدور کے لیے آ سانیاں پیدا کرنے کے لئے کوشاں ہے۔قبل ازیں وفاقی وزیر انجینئر امیر مقام نے چیئرمین آل پاکستان ایمپلائز کنفیڈریشن الحاج عبدالمناف خان، چیف آرگنائزر پروفیسر محمد اور نومنتخب عہدیداران سے حلف لیا۔اس موقع پر میجر جنرل ریٹائرڈ فرخ بشیر بھی موجود تھے۔انہوں نے بھی خطاب کیا اور نومنتخب باڈی اور حلف برداری پر مبارکباد دی۔

Short Link: https://urdu.app.com.pk/urdu/?p=564733