اسلام آباد۔11جولائی (اے پی پی):دریائے ستلج میں گنڈا سنگھ والا میں درمیانے درجے کے سیلاب کا امکان ظاہر کیا گیا ہےجبکہ ملحقہ نشیبی علاقے ممکنہ اثرات کے زیرِ اثر آسکتے ہیں، علاوہ ازیں ملک کے مختلف شہروں میں تیز ہوا، آندھی گرج چمک کیساتھ موسلادھار بارش کا امکان ہے۔
نیشنل ڈیزاسٹر مینجمنٹ اتھارٹی (این ڈی ایم اے) کی جانب سے جاری مون سون اپ ڈیٹ کے مطابق بارشوں کی وجہ سے نشیبی علاقوں میں سیلاب اور پہاڑی علاقوں میں لینڈ سلائیڈ کا خدشہ ہے، تیز آندھی و گرج چمک سے کمزور اور خستہ حال بجلی کے کھمبوں، سولر پینل، بل بورڈز، اونچے درختوں یا زیر تعمیر عمارتی ڈھانچوں کو نقصان پہنچ سکتا ہے۔شہری و ضلعی انتظامیہ کو ہدایت کی گئی ہے کہ سیلاب کے خطرے سے دوچار علاقوں میں ایمرجنسی عملہ و مشینری بشمول ڈی واٹرنگ پمپس کی فراہمی یقینی بنائیں۔
انتظامیہ ٹریفک کی روانی برقرار رکھنے کیلئے انڈر پاس و نشیبی سڑکوں سے نکاسی آب کے دوران مترادف ٹریفک پلان اور متعلقہ ضلعی انتظامیہ سٹاک ٹیکنگ کی تکمیل کو یقینی بنائیں۔ سیلاب کے خطرے سے دوچار علاقوں کی انتظامیہ 20 جولائی تک متوقع امکانات کے حوالے سے حساس علاقوں بالخصوص دریائے چناب پر تریموں اور دریائے راوی پر جسر کے مقام پر مانیٹرنگ جاری رکھیں۔دریں اثناء پی ڈی ایم اے پنجاب کو ہدایت کی گئی ہے کہ دریائے چناب، راوی، ستلج اور منسلک نالوں کے گرد نشیبی علاقوں کے مکینوں کو بروقت اطلاع دیتے ہوئے انخلاء کو یقینی بنائے۔ ریسکیو سروسز، افواج پاک، متعلقہ علاقوں میں متحرک این جی اوز ہنگامی صورتحال میں فوری ردعمل کو یقینی بنانے کیلئے تیار رہیں۔
