ملتان ۔ 17 جنوری (اے پی پی):ڈائریکٹر جنرل سوشل ویلفیئر پنجاب، سکندر ذیشان کی جانب سے ملتان ڈویژن کے چاروں اضلاع میں وزیر اعلیٰ پنجاب کے "دھی رانی پروگرام” کے تحت مستحق جوڑوں کی اجتماعی شادیوں کا شیڈول جاری کردیا گیا ہے۔ اس ضمن میں ایک جائزہ اجلاس کمشنر ملتان ڈویژن عامر کریم خان کی زیر صدارت ان کے کانفرنس روم میں منعقد ہوا ۔ اجلاس میں ڈویژنل ڈائریکٹر سوشل ویلفیئر ملتان میڈم ام فروہ ہمدانی نے بتایا کہ ضلع ملتان میں اگلے ہفتہ اجتماعی شادیوں کے پروگرام کے انعقاد کا شیڈول ترتیب دیا گیا ہے۔ ضلع ملتان میں 24 جنوری، ضلع خانیوال میں 30 جنوری، ضلع وہاڑی میں 12 فروری اور ضلع لودھراں میں 23 فروری کو اجتماعی شادیوں کے پروگرام منعقد ہونگے۔
انہوں نے مزید بتایا کہ ضلع ملتان میں 63 ، ضلع خانیوال میں 81 ، ضلع وہاڑی میں 84 اور ضلع لودھراں میں 71 جبکہ مجموعی طورپر 299 جوڑوں کی اجتماعی شادیوں کا انتظام کیاجائیگا۔ ہر جوڑے کو وزیر اعلیٰ پنجاب مریم نواز شریف کی جانب سے جہیز اور دلہن کو بذریعہ اے ٹی ایم ایک لاکھ روپے سلامی دی جائیگی۔ انہوں نے مزید بتایا کہ تقریب میں ہر جوڑا 20 مہمانوں کے ساتھ شرکت کر سکے گا ۔ دوران اجلاس کمشنر ملتان ڈویژن عامر کریم خان نے چاروں اضلاع کے ڈپٹی کمشنرز کو محکمہ سوشل ویلفیئر کے افسران سے مل کر اجتماعی شادیوں کے بہترین انتظامات بروقت مکمل کرنے کی ہدایت کی۔ بعد ازاں اس حوالہ سے ڈویژنل ڈائریکٹر سوشل ویلفیئر ملتان میڈم ام فروہ ہمدانی نے ایڈیشنل ڈپٹی کمشنر فنانس مبشرالرحمن، ڈپٹی ڈائریکٹر سوشل ویلفیئر عبدالعزیز خان اور اسسٹنٹ کمشنر ملتان سٹی عبدالسمیع شیخ کے ہمراہ
اجتماعی شادیوں کی تقریب میں 1400 افراد کی گیدرنگ کے لیے ملتان شہر کے مختلف شادی ہالز، مارکی کے وزٹ کیے اور معذور افراد اور دیگر افراد کی آسانی کے لئےآنے جانے اور بیٹھنے کی جگہ، جنرل پارکنگ اور ریڈ زون کے لیے سکیورٹی، روڈز میپ سمیت دیگر سہولیات اور ان کے انتظامات کے لیے جائزہ لیا۔ تاکہ اجتماعی شادیوں کی تقریب کے لیے جگہ فائنل کی جا سکے۔
