اسلام آباد۔26ستمبر (اے پی پی):پاکستان کے ہولناک سیلاب متاثرین کے لئے بیرون ملک سے امدادی پروازوں کی آمد کا سلسلہ جاری ہے، اب تک مختلف ملکوں سے129 پروازیں متاثرین کے لئے امدادی سامان لیکر پاکستان پہنچ گئی ہیں۔ پیرکو دفتر خارجہ کے ترجمان کے جاری اعداد و شمار کے مطابق سیلاب زدگان کے لئے متحدہ عرب امارات سے اب تک مجموعی طور پر 41، ترکیہ سے 14، چین سے 4، ازبکستان سے ایک، قطر سے چار، فرانس سے ایک، یونیسف کی تین، اقوام متحدہ کے پناہ گزینوں کے ادارہ ( یو این ایچ سی آر) کی متحدہ عرب امارات سے چلائی جانے والی 13 پروازیں، ترکمانستان کی ایک، اردن کی ایک، عالمی ادارہ خوراک کی تین، امریکہ کی 21، برطانیہ کی ایک، نیپال کی ایک، اومان کی آٹھ، روس، یونان اور اٹلی کی ایک ایک اور سعودی عرب کی 9 پروازیں امدادی سامان لیکر پاکستان پہنچی ہیں۔
اس کے علاوہ ایران سے 100 ٹن امدادی سامان ٹرکوں کے ذریعے پاکستان پہنچا ہے۔ سیلاب زدگان کے لئے ترکیہ کی جانب سے تین ریل گاڑیوں اور دو ٹرکوں پر مشتمل امدادی سامان پاکستان بھیجا گیا ہے۔ پاکستان کے سیلاب متاثرین کے لئے تاجکستان سے 87 ٹرکوں کے ذریعے امدادی سامان بیھجا گیا ہے۔ متحدہ عرب امارات سے امدادی سامان لے کر ایک بحری جہاز بھی کراچی پہنچا ہے۔
