لاہور۔2اپریل (اے پی پی):سینئر صوبائی وزیر مریم اورنگزیب نے لاہور چڑیا گھر میں زائد قیمتیں وصول کرنے کی شکایات کا سخت نوٹس لے لیا ۔ انہوں نے کہا کہ عوام صرف 100 روپے میں پورا چڑیا گھر دیکھ سکتے ہیں، قیمت میں کسی قسم کا کوئی اضافہ نہیں کیا گیا ۔مریم اورنگزیب نے بتایا کہ رینگنے والے جانوروں کو دیکھنے کا ٹکٹ 200 روپے ہے اسی طرح ایکویریم کا 200 روپے اور ہولوگرام کا ٹکٹ 300 روپے ہے نئی سہولیات ہیں جن کی قیمت الگ مقرر کی گئی ہے چڑیا گھر کا 98 فیصد حصہ 100 روپے میں دیکھا جا سکتا ہے۔
داخلہ ٹکٹ کے لیے الگ کائونٹرز موجود ہیں، ٹکٹنگ سینٹر کے باہر ایک شکایت سیل بھی قائم ہے جہاں کسی بھی قسم کی شکایت کی جا سکتی ہے دو سال کے بعد عید الفطر پر چڑیا گھر کھلا ہے۔گزشتہ روز 35 ہزار شہری چڑیا گھر آئے جو ریکارڈ ہے زیادہ افراد کی آمد کی وجہ سے بعض انتظامی مسائل پیدا ہوئے، یقینی بنایا جا رہا ہے کہ مستقبل میں ایسا نہ ہو صوبائی وزیر نے شکایت کے ازالہ کے لیے ڈی جی وائلڈ لائف کو فوری چڑیا گھر پہنچنے کی ہدایت کر دی۔
Short Link: https://urdu.app.com.pk/urdu/?p=577984
