اسلام آباد ۔ 19 اکتوبر (اے پی پی) صدر آزاد جموں و کشمیر سردار محمد مسعود خان سے معروف عالم دین اور مسلم لیگ (ن) آزاد کشمیر علماءمشائخ ونگ کے سربراہ مولانا عبید اللہ فاروقی نے ملاقات کی۔ ملاقات میں مقبوضہ کشمیر کی تازہ ترین صورتحال، بھارتی مظالم، عالمی سطح پر مسئلہ کشمیر کے حوالے سے سفارتی کوششوں اور منگ سب ڈویژن میں تعمیر و ترقی، بڑی شاہرات اور رابطہ سٹرکوں کی پختگی و مرمت سمیت دیگر علاقائی مسائل پر تبادلہ خیال کیا گیا۔ صدر سردار محمد مسعود خان نے اس موقع پر کہا کہ عہدہ صدارت عوام اور منتخب نمائندوں کی امانت ہے ۔ اپنی ذمہ داریوں سے بطریق احسن عہدہ برآ ہونے کے لیے کوشاں ہوں۔ مسئلہ کشمیر کے حوالے سے بین الاقوامی برادری کی توجہ مبذول کروانے کے لیے سفارتی کوششیں جاری ہیں۔ مقبوضہ کشمیر میں بھارتی مظالم کی داستان بڑی ہولناک ہے ۔ آج وہاں کرفیو کا 104 دن ہے ۔ ہزاروں افراد کو بھارتی فوجیوں نے چھروں والی بندوقوں سے زخمی کر دیا ہے ۔ 1500 افراد کی آنکھوں کو نشانہ بنایا گیا ۔ جس میں سے ساڑھے چھ سو افراد کلی یا جزوی طور پر بصارت سے محروم ہو چکے ہیں ۔
