عمران غزنوی کی تصنیف "شہرت کا انتظام اور بحرانی مواصلات: کارپوریٹ شعبے کا مطالعہ” بین الاقوامی ایوارڈ کے لئے نامزد

اسلام آباد۔21اپریل (اے پی پی):عمران غزنوی کی معروف تصنیف "شہرت کا انتظام اور بحرانی مواصلات: کارپوریٹ شعبے کا مطالعہ” کو اکیڈمی فار گلوبل بزنس ایڈوانسمنٹ (اے جی بی اے) امریکہ کی جانب سے بین الاقوامی ایوارڈ کے لئے نامزد کیا گیا ہے۔ اے جی بی اے ایک عالمی سطح پر تسلیم شدہ غیر منافع بخش تنظیم ہے جو دنیا بھر میں بزنس سکالرشپ اور لیڈرشپ کو فروغ دینے کے لئے وقف ہے۔

جاری اعلامیہ کے مطابق عمران غزنوی کو اے جی بی اے کی 2 سے 4جولائی 2025 تک بنکاک میں منعقدہ سالانہ بین الاقوامی کانفرنس کے دوران ایوارڈ سے نوازا جائے گا۔ بین الاقوامی کانفرنس میں عمران غزنوی کو بھی بطورکلیدی مقرر بھی مدعو کیا گیا ہے جہاں وہ عالمی کارپوریٹ لیڈرز کے سامنے بزنس سٹرٹیجی، شہرت اور قیادت جیسے اہم موضوعات پر اپنے خیالات کا اظہار کریں گے۔

کانفرنس میں دنیا کی نامور یونیورسٹیوں کے سکالرز اور اکیڈمک لیڈرز بھی شریک ہوں گے جو "عالمی اور ڈیجیٹل دور میں بزنس اور انٹرپرینیورشپ کی ترقی” کے موضوع پر تبادلہ خیال کریں گے۔ عمران غزنوی کی کتاب کارپوریٹ شعبے میں شہرت کے انتظام کی سٹرٹیجک اہمیت پر روشنی ڈالتی ہے، کتاب کو آج کے پیچیدہ بزنس ماحول میں بحرانوں سے نمٹنے کے لئے بروقت بصیرت اور عملی طریقہ کارفراہم کرنے پر عالمی سطح پر سراہا گیا ہے۔

Short Link: https://urdu.app.com.pk/urdu/?p=585087