فیصل آباد۔ 15 اکتوبر (اے پی پی):محکمہ زراعت نے سموگ سے بچاؤ کیلئے کاشتکاروں کو دھان کے مڈھوں کو آگ نہ لگانے کی ہدائت کی ہے اور کہا ہے کہ دھان کے مڈھوں کو آگ لگانے سے فضائی آلودگی(سموگ)پیدا ہوتی ہے لہٰذا کاشتکاردھان کے مڈھوں کو آگ نہ لگائیں بلکہ ان کو زمین میں ملا کر زمین کی زرخیزی میں اضافہ کریں۔نظامت زرعی اطلاعات محکمہ زراعت کے ترجمان نے اے پی پی کوبتایاکہ دھان کے مڈھوں کو آگ لگانے کے واقعات کو روکنے کیلئے محکمہ زراعت ہر ممکن اقدام کررہا ہے کیونکہ سموگ کی وجہ سے انسانی زندگی،مویشیوں،چرند پرند، فصلات، باغات اور سبزیوں پر منفی اثرات مرتب ہونے کا اندیشہ موجود ہوتا ہے۔
انہوں نے بتایاکہ فیلڈ اسسٹنٹس روزانہ کی بنیاد پر دھان کی فصل کی باقیات کو جلائے جانے والے واقعات کو مانیٹر کررہے ہیں جو اس کی رپورٹ ڈائریکٹر(ایم اینڈ ای) اوراپنے متعلقہ ڈویژنل ڈائریکٹر کو ارسال کریں گے۔ انہوں نے کہا کہ دھان کے مڈھوں کو آگ لگانے کی صورت میں متعلقہ کاشتکار کے خلاف محکمہ داخلہ حکومت پنجاب کی جانب سے عائد کردہ دفعہ 144 کے تحت کاروائی عمل میں لائی جائے گی لہٰذ ٰا کاشتکار دھان کی کٹائی کے بعد مڈھوں کو آگ لگانے سے گریز کریں۔
انہوں نے کہا کہ دھان کے مڈھوں کو آگ لگانے سے زمین کی بالائی سطح پر موجود نامیاتی مادہ کو نقصان پہنچتا ہے اور زمین کی زرخیزی متاثر ہوتی ہے اس کے علاوہ دھان کے مڈھوں سے اٹھنے والے دھویں سے ٹریفک حادثات اور انسانی جانوں کے ضیاع بھی ہوتا ہے۔ انہوں نے کہاکہ کاشتکاردھان کے مڈھوں کو تلف کرنے کیلئے روٹا ویٹر یا ڈسک ہیرو کی مدد سے باقیات کو زمین میں ملا دیں یا گہرا ہل چلا کر آدھی بوری یوریا فی ایکڑ چھٹہ کرکے پانی لگا دیں کیونکہ اس سے زمین کی زرخیزی اور پیداواری صلاحیت میں اضافہ ہوتا ہے۔
انہوں نے کہاکہ اس ضمن میں کاشتکاروں سے بھی اپیل کی جاتی ہے کہ وہ محکمہ زراعت سے مکمل تعاون کریں کیونکہ سموگ کی وجہ سے انسانی زندگیوں پر براہ راست منفی اثرات مرتب ہوتے ہیں لہٰذا ملکی مفادعامہ کو مد نظر رکھتے ہوئے دھان کے مڈھوں کو آگ لگانے سے گریز کیا جائے۔
Short Link: https://urdu.app.com.pk/urdu/?p=512845
