اسلام آباد۔15جولائی (اے پی پی):وفاقی وزیر داخلہ رانا ثناء اللہ خان نے کہا ہے کہ معاشرے میں اخلاقی اقدار پامال کرنے والوں کیخلاف متعلقہ ادارے زیرو ٹالرینس پالیسی اپنائیں،شہریوں کی عزت نفس محفوظ بنانے، ان کو ہراسگی اور بلیک میلنگ سے بچانے کیلئے ایف آئی اے، پی ٹی اے اور دیگر ادارے فعال کردار ادا کریں۔ وہ جمعہ کو وزارت داخلہ میں اعلی سطحی اجلاس سے خطاب کررہے تھے۔
اجلاس میں وفاقی سیکرٹری داخلہ یوسف نسیم کھوکھر، آئی جی پنجاب راؤسردارعلی خان، ڈائریکٹر جنرل ایف آئی اے محمدطاہررائے، قائم مقام چئیرمین نادرا بریگیڈیئر (ریٹائرڈ) خالدلطیف اور دیگرحکام نے شرکت کی۔ اجلاس میں سوشل میڈیا پرشہریوں کی ہراسگی،غیراخلاقی ویڈیوزاپلوڈ کرنے،بلیک میلنگ اوران کی کردارکشی سے متعلق معاملات کاجائزہ لیا گیا۔
اجلاس میں سوشل میڈیا کے ذریعےغیراخلاقی مواد کی تشہیر،شہریوں کی ہراسگی اورکردار کشی کی ذریعے ساکھ خراب کرنے والوں کیخلاف کریک ڈاؤن کا فیصلہ کیا گیا ہے۔وزیر داخلہ کی سائبرکرائم میں ملوث ایسے افراد کیخلاف سخت اور فوری ایکشن کیلئے ڈائیریکٹر جنرل ایف آئی اے کو ہدایات جاری کیں۔اجلاس میں سائبرکرائم بالخصوص ہراسگی اور توہین آمیز مواد اپ لوڈ کرنے اوراس کی تشہیر سے متعلق قوانین کو موثر بنانے کا بھی فیصلہ کیا گیا ہے۔
ہراسگی اور کردارکشی کے ذریعے ساکھ خراب کرنےکے معاملے پر پیکا2016 میں ضروری ترامیم لانے کیلئے ورکنگ گروپ تشکیل دینے کا فیصلہ کیا گیا ہے۔ورکنگ گروپ سوشل میڈیا پر ہراسگی، کردارکشی اور توہین آمیز مواد روکنے کیلئے قانون سازی اورانتظامی اقدامات کے حوالے سے معاملات کاجائزہ لے گا۔ورکنگ گروپ تمام سٹیک ہولڈرز سے مشاورت اور اتفاق رائے سے اپنی مرتب شدہ سفارشات وزارت داخلہ کو پیش کرے گا۔شہریوں کی شکایات کیلئے ایف آئی اے نے رابطہ نمبرز بھی جاری کردئیے۔
اجلاس سے خطاب کرتے ہوئے وزیر داخلہ نے کہا کہ سوشل میڈیا پرتوہین آمیز مواد اور شہریوں کی کردارکشی کے ذریعے ساکھ خراب کرنا کسی صورت قابل قبول نہیں۔ سوشل میڈیا پرغیراخلاقی اور توہین آمیز مواد کی موجودگی اور اس کی تشہیر سے معاشرے میں انارکی اور بیگاڑکا اندیشہ ہے۔
انہوں نے کہا کہ ایسے جرائم میں ملوث افراد کیخلاف سخت ایکشن لیا جائے گا، کاروائی بلا تفریق عمل میں لائی جائے گی۔شہری اپنی شکایات ایف آئی اے کے رابطہ نمبرز پر بھیجیں،شکایات پر بلا تاخیر عملدرآمد کریں گے۔ ڈی جی ایف آئی اے نے کہا کہ سائبر سپیس میں ہراسگی، کردار کشی، غیراخلاقی مواد اور بلیک میلنگ سے متعلق شکایات ایف آئی اے کے رابطہ نمبرز پر درج کرواسکتے ہیں۔ شہری اپنی شکایات ایف ائی اے پورٹل، شکایت نمبر 111345786 یا ایف آئی آئے کے کسی بھی دفتر میں درج کروا سکتے ہیں
