اسلام آباد۔7جولائی (اے پی پی):وفاقی وزیر تجارت جام کمال خان کی زیر صدارت ٹریڈ ڈویلپمنٹ اتھارٹی آف پاکستان (ٹی ڈی اے پی) کے بورڈ کا 12واں اجلا س اسلام آباد میں منعقد ہوا۔ اجلاس میں سینئر سرکاری حکام اور ٹی ڈی اے پی بورڈ کے اراکین نے شرکت کی۔اجلاس میں پاکستان کی برآمدی مسابقت کو بڑھانے اور تجارتی سہولت کاری میں بہتری لانے کے لیے کئی اہم اسٹریٹجک اقدامات کا جائزہ لیا گیا اور منظوری دی گئی۔
بورڈ نے مالی سال 2025-26 کے سالانہ بزنس پلان، 120 سے زائد بین الاقوامی نمائشوں میں شرکت، ایتھوپیا اور بنگلہ دیش میں “میڈ اِن پاکستان” نمائشوں، قومی سطح پر نمائشوں، برآمدات کے فروغ پر سیمینارز اور ملک بھر میں قومی برآمدی تربیتی پروگراموں کی منظوری دی۔علاقائی تجارتی ڈھانچے کو مضبوط بنانے کے لئے ٹی ڈی اے پی کے کوئٹہ اور سیالکوٹ میں ریجنل دفاتر میں ڈسپلے سینٹرز، کانفرنس رومز اور آئی ٹی ایکسیلیریٹرز کے قیام کی منظوری دی گئی، جبکہ سیالکوٹ میں کھیلوں کے سامان اور سرجیکل آلات کے لئے خصوصی سہولیات فراہم کی جائیں گی۔بورڈ نے بین الاقوامی تجارتی نمائشوں میں خواتین کاروباری شخصیات کی شمولیت بڑھانے کے اقدامات کی بھی توثیق کی۔
وفاقی وزیر تجارت جام کمال خان نے زور دیا کہ پاکستان کو برآمدات کے لئے صرف روایتی منڈیوں پر انحصار کرنے کے بجائے ابھرتی ہوئی بین الاقوامی منڈیوں کی طرف توجہ دینی چاہیے تاکہ برآمدات میں تنوع آئے اور مخصوص خطوں پر انحصار کم ہو۔انہوں نے ٹی ڈی اے پی کے اندر شعبہ جاتی تحقیق کے لئے مخصوص ریسرچرز کی تعیناتی کی تجویز بھی دی تاکہ ڈیٹا پر مبنی تحقیقی تجزیے اور مشورے فراہم کئے جا سکیں، جو پالیسی سازی اور منصوبہ بندی کو مزید مؤثر بنائیں گے۔
وزیر تجارت نے ٹی ڈی اے پی کی تنظیم نو کی کوششوں کو سراہتے ہوئے کہا کہ ادارے کو ایک مؤثر اور برآمدات پر مرکوز ادارہ بنانے کے لئے یہ اقدامات اہم ہیں، جو عالمی تجارت کی جدید ضروریات سے ہم آہنگ ہوں۔اجلاس میں بیرون ملک پاکستان کے تجارتی مشنز کے لیے پروموشنل سپورٹ میں اضافے کی منظوری دی گئی، جبکہ ٹی ڈی اے پی بورڈ کی سب کمیٹیوں کی سفارشات کی بھی توثیق کی گئی۔
