اسلام آباد۔17دسمبر (اے پی پی):وزیر خارجہ مخدوم شاہ محمود قریشی دو روزہ دورے پر جمعرات کو متحدہ عرب امارات روانہ ہوگئے۔وزیر خارجہ کا یہ دورہ مسلم ممالک کے ساتھ دو طرفہ تعلقات کے فروغ کے حوالے سے وزیر اعظم عمران خان کے وژن کی روشنی میں دونوں ممالک کے مابین اعلیٰ سطحی روابط کے فروغ کا تسلسل ہے ۔وزیر خارجہ اپنے اس دو روزہ دورے کے دوران اماراتی قیادت سے ملاقاتیں کریں گے۔ان ملاقاتوں میں دو طرفہ تعلقات ،کثیر الجہتی شعبہ جات میں دو طرفہ تعاون کے فروغ سمیت باہمی دلچسپی کے امور پر تبادلہ خیال کیا جائے گا۔پاکستانیوں کی ایک کثیر تعداد متحدہ عرب امارات میں مقیم ہے – وزیر خارجہ، اپنے اس دورہ کے دوران متحدہ عرب امارات میں مقیم پاکستانی کمیونٹی سے بھی ملاقات کریں گے ۔توقع ہے کہ وزیر خارجہ کا یہ دورہ، پاکستان اور متحدہ عرب امارات کے مابین گہرے تاریخی ،مذہبی اور تہذیبی بنیادوں پر استوار دو طرفہ تعلقات کو مزید وسعت دینے میں معاون ثابت ہو گا۔
