اسلام آباد ۔ 12 نومبر (اے پی پی) وزیراعظم عمران خان سے قطر کی مسلح افواج کے چیف آف سٹاف لیفٹیننٹ جنرل غانم بن شاہین الغانم نے ملاقات کی۔ انہوں نے وزیراعظم کو قطر کے امیر اور وزیراعظم کی جانب سے نیک تمناﺅں کا پیغام پہنچایا اور انہیں وزارت عظمیٰ کا عہدہ سنبھالنے پر مبارکباد دی۔ وزیراعظم عمران خان نے دونوں ممالک کے درمیان باہمی تعلقات کے فروغ پر اطمینان کا اظہار کیا اور ان تعلقات کو باہمی مفاد میں آگے بڑھانے کے عزم کا اعادہ کیا۔ حماد پورٹ کے افتتاح اور اسے کراچی کی بندرگاہ کے ساتھ فیری سروس کے ذریعے منسلک کرنے کے بعد قطر کو پاکستان کی برآمدات میں 73 فیصد اضافہ کا حوالہ دیتے ہوئے انہوں نے اس یقین کا اظہار کیا کہ آنے والے سالوں میں دوطرفہ تجارت مزید بڑھے گی۔
