اسلام آباد ۔ 07 فروری (اے پی پی) وزیراعظم محمد نواز شریف 20خصوصی بچوں کے ہمراہ 9فروری کو موسم بہار 2017ءکی شجر کاری مہم کا افتتاح کریں گے۔ وزیراعظم پاکستان کے وژن کے مطابق9فروری 2017ءکو ہی پاکستان بھر میں نیشنل گرین ڈے منایا جارہا ہے۔ اس گرین قومی دن کی بنیادی خصوصیت یہ ہے کہ اس دِن تمام صوبوں آزادجموں وکشمیر، گلگت بلتستان میں مختلف اقسام کے علاقائی اور مقامی اقسام کے پودے لگائے جائیں گے۔بلوچستان ،گلگت بلتستان، خیبر پختونخوا،سندھ کے وزراءاعلیٰ اور آزاد جموں و کشمیر نے شجر کاری مہم میں بھرپور حصہ لینے پر رضا مندی کا اظہار کیا ہے اور کہا ہے کہ وزیراعظم پاکستان کی طرف سے وفاق کی سطح پر شروع کی جانے والی اس شجر کاری مہم میں بڑھ چڑھ کر حصہ لیا جائے گا۔پاکستان کی تاریخ میں پہلی بار بڑے وسیع پیمانے پر شجر کاری کی جائے گی اور اسی طرح سیاسی قیادت، سول سوسائٹی کی تنظیموں اور غیر سرکاری ادارے بھی پاکستان بھر اور تمام صوبوں میں اسی دن کے موقع پر شجرکاری کریں گے اور پاکستان کو سر سبز بنانے کا قومی دن منائیں گے۔موسم بہار کی موجودہ شجرکاری مہم میں 257 ملین پودے لگانے کا ہدف مقرر کیا گیا ہے جن میں سے زیاد تر پودے مقامی طور پر پیدا ہونے والی اقسام کے ہوں گے۔
