اسلام آباد۔25اگست (اے پی پی):وفاقی وزیر توانائی سردار اویس احمد خان لغاری کی زیر صدارت گلگت بلتستان میں 100 میگاواٹ سولرائزیشن منصوبے کے حوالے سے سٹیئرنگ کمیٹی کا اجلاس یہاں منعقد ہوا ۔ اجلاس میں وزارت توانائی اور متعلقہ اداروں کے اعلیٰ حکام نے شرکت کی۔پیر کووزارت توانائی (پاور ڈویژن) کی جانب سے جاری بیان کے مطابق وزیرِاعظم کی ہدایت پر تشکیل دی گئی سٹیئرنگ کمیٹی کی صدارت کرتے ہوئے وفاقی وزیر نے کہا کہ منصوبے کی بروقت تکمیل کے لئے جامع حکمتِ عملی کے تحت عملی اقدامات اٹھائےجائیں گے۔
انہوں نے کہا کہ گلگت بلتستان کے عوام کو سستی اور ماحول دوست بجلی کی فراہمی حکومت کی اولین ترجیح ہے۔ وفاقی وزیر نے کہا کہ متبادل ذرائع سے توانائی کا حصول وقت کی ضرورت ہے اور حکومت اس ضمن میں پائیدار توانائی کے منصوبوں پر بھرپور توجہ دے رہی ہے۔وفاقی وزیر نے گلگت بلتستان کے 100 میگاواٹ سولرائزیشن منصوبے کو قومی ترقی کا سنگ میل قرار دیتے ہوئے کہا کہ یہ منصوبہ نہ صرف مقامی عوام کے لئے توانائی کی فراہمی میں بہتری لائے گا بلکہ خطے میں اقتصادی و سماجی ترقی کی راہ بھی ہموار کرے گا۔
