اسلام آباد۔18نومبر (اے پی پی):چوتھے ٹی ٹونٹی بلائنڈ کرکٹ ورلڈ کپ میں شرکت کے لیے جنوبی افریقہ کی ٹیم 20 نومبر ،بنگلہ دیش ،نیپال اور سری لنکا کی ٹیمیں 21 نومبرکو پاکستان آئیں گی جبکہ بھارتی بلائنڈ کرکٹ ٹیم کو بھارتی وزارت خارجہ کے این او سی کا انتظار ہے۔
پیر کو پاکستان بلائنڈ کرکٹ کونسل کے چیئرمین اور ورلڈ بلائنڈ کرکٹ لمیٹڈ کے صدر سید سلطان شاہ نے’’ اے پی پی‘‘ کو بتایا کہ جنوبی افریقہ کی ٹیم 20 نومبر کی صبح لاہور پہنچے گی جبکہ بنگلہ دیش سری لنکا اور نیپال کی ٹیمیں21 نومبر کو پاکستان پہنچ رہی ہیں ۔انہوں نے کہا کہ بھارتی بلائنڈ کرکٹ ٹیم کو بھارتی وزارت خارجہ کے این ای سی کا انتظار ہے جس کے بعد بھارتی ٹیم کو شیڈول کے مطابق 21 نومبر کو پاکستان پہنچنا ہے ۔
سید سلطان شاہ نے کہا کہ افغانستان کی بلائنڈ کرکٹ ٹیم کے 23میں سے 19افراد کو ویزے جار ی کردیئے گئے ہیں جبکہ باقی چار افراد کو بھی جلد ویزے جاری کردیئے جائیں گے ۔ افغانستان کی ٹیم ورلڈ کپ میں شرکت کےلئے 19نومبر کو پاکستان آئے گی۔انہوں نے کہاکہ تمام غیر ملکی ٹیموں کے لئے بھرپور سکیورٹی کے انتظامات کئے گئے ہیں۔ انہوں نے کہا کہ ورلڈ بلائنڈ ٹی ٹونٹی کرکٹ کپ 22 نومبر سے 3 دسمبر2024 تک لاہور اور ملتان میں کھیلا جارہا ہےجس کی افتتاحی تقریب22 نومبرکو لاہور میں ہوگی۔
ایونٹ کے سیمی فائنل مقابلے یکم دسمبر جبکہ فائنل3 دسمبرکو معذوروں کے عالمی دن کے موقع پر کھیلا جائے گا۔ انہوں نے کہا کہ بلائنڈ ٹی ٹونٹی کرکٹ کپ میں 7 ٹیمیں حصہ لیں گی جن میں میزبان پاکستان سمیت افغانستان،بھارت،بنگلہ دیش، سری لنکا ، جنوبی افریقہ اور نیپال کی ٹیمیں شامل ہیں۔
انہوں نے کہاکہ پی بی سی سی نےورلڈ کپ کے انتظامات کو حتمی شکل دے دی ہے۔ ورلڈ کپ کے 15 میچزلاہور جبکہ 9 میچزملتان میں کھیلے جائیں گے۔
