روہت شرما کے ہاں ددسرے بچے کی پیدائش متوقع،پرتھ میں کینگروز کے خلاف پہلا ٹیسٹ نہیں کھیل سکیں گے

نئی دہلی۔18نومبر (اے پی پی):بھارت کی مردوں کی کرکٹ ٹیم کے کپتان اور مایہ ناز بلے باز روہت شرما آسٹریلیا کے خلاف بارڈر۔گواسکر ٹرافی سیریز کے پرتھ میں شیڈول ابتدائی ٹیسٹ میچ کے لئے اپنی ٹیم کو دستیاب نہیں ہوں گے۔ 37 سالہ روہت شرما اپنے ہاں دوسرے بچے کی متوقع پیدائش کے لئے وطن واپس لوٹ آئے تھے اس لئے روہت شرما بارڈر گواسکر ٹرافی کے پہلے ٹیسٹ میچ میں بھارتی ٹیم کی قیادت نہیں کریں گے ۔

آسٹریلیا اور بھارت کی ٹیموں کے درمیان پانچ ٹیسٹ میچوں کی سیریز کا پہلا ٹیسٹ میچ 22 نومبر سے پرتھ کے اوپٹس سٹیڈیم میں شروع ہوگا۔ روہت شرما کی غیر موجودگی میں فاسٹ بائولر جسپریت بمراہ ٹیم کی قیادت کریں گے۔ جسپریت بمراہ اس سے قبل ایک ٹیسٹ میں بھارتی ٹیم کی قیادت کر چکے ہیں۔

روہت شرما نے بی سی سی آئی اور قومی سلیکٹرز کو پہلے ہی بتا دیا تھا کہ وہ پرتھ ٹیسٹ نہیں کھیل سکیں گے تاہم انہوں نے بی سی سی آئی کو بتایا کہ وہ ایڈیلیڈ میں دوسرے ڈے اینڈ نائٹ ٹیسٹ سے قبل 30 نومبر سے پرائم منسٹر الیون کے خلاف دو روزہ گلابی گیند کا وارم اپ میچ کھیلنے کے لیے ٹیم کو دستیاب ہوں گے