اسلام آباد۔1مارچ (اے پی پی):پاکستان 6 مارچ کو 9 ویں پاکستان -یورپی یونین پولیٹیکل ڈائیلاگ کی میزبانی کرے گا۔
ترجمان دفتر خارجہ ممتاز زہرہ بلوچ نے جمعہ کو یہاں پریس بریفنگ میں بتایا کہ سیکرٹری خارجہ محمد سائرس سجاد قاضی پاکستانی وفد کی قیادت کریں گے جبکہ یورپی یونین کی طرف سے ڈپٹی سیکرٹری جنرل یورپی ایکسٹرنل ایکشن سروس اینریک مورا قیادت کریں گے۔
ترجمان نے کہا کہ فریقین پاکستان-یورپی یونین سٹریٹجک انگیجمنٹ پلان پر عملدرآمد، انسداد دہشت گردی کے ساتھ ساتھ اہم علاقائی اور عالمی پیش رفت پر تبادلہ خیال کریں گے۔ پاکستان اور یورپی یونین کا آخری سیاسی ڈائیلاگ 22 نومبر 2022 کو برسلز میں ہوا تھا۔
