فیصل آباد۔ 27 دسمبر (اے پی پی):فیصل آباد ڈویژن کے ضلع جھنگ سمیت بہاولپور،لودھراں،وہاڑی، ملتان، مظفر گڑھ اور ڈیرہ غازی خان میں کھجور کی کاشت میں اضافہ ہوگیاہے ، ملک میں کھجور کا زیر کاشت رقبہ 99205 ہیکٹرز اور پیداوار 609906ٹن ہے، پنجاب میں زیر کاشت رقبہ 6981 ہیکٹرز اور کھجور کی پیداوار 54841 ٹن سے تجاوز کرگئی ہے جس میں ابھی بھی اضافے کی وسیع گنجائش موجود ہے۔
ڈیٹ پام ریسرچ انسٹیٹیوٹ آری فیصل آباد کے ترجمان نے بتایاکہ کھجور جسے پھلوں میں انتہائی اہمیت حاصل ہے ،انسانی صحت کےلئے بیحد مفید ہے۔
انہوں نے کہا کہ کھجور کے مختلف حصوں سے 800 کے قریب مختلف اشیا تیار کی جاتی ہیں ،اس کی بہترین اقسام سعودی عرب، عراق، مصر اور ایران میں پائی جاتی ہیں۔انہوں نے بتایا کہ پاکستان مختلف ممالک کو کھجور بر آمد کرتا ہے جن میں آسٹریلیا، بنگلہ دیش، کینیڈا، یونان، ڈنمارک، بھارت، جرمنی، نیپال، سپین، سری لنکا، امریکا اور برطانیہ شامل ہیں۔
انہوں نے کہا کہ ان ممالک کو کھجور برآمد کرکے قیمتی زرمبادلہ حاصل کیا جاتا ہے جس سے ملک کی معاشی پوزیشن بہتر بنانے میں مدد ملتی ہے۔
Short Link: https://urdu.app.com.pk/urdu/?p=539961
