لاہور۔10مئی (اے پی پی):سابق وزیراعلی پنجاب حمزہ شہباز نے کہا ہے کہ پاکستان کا بھارت کو بھرپور جواب قابل تحسین ہے،پاک افواج نے ثابت کیا کہ وطن کی طرف اٹھنے والی ہر میلی آنکھ کو نکال دیا جائے گا۔ ہفتہ کے روزآپریشن ”بنیان مرصوص” اور پاکستان کا بھارتی جارحیت کے جواب پر جاری اپنے ایک بیان میں انہوں نے کہا کہ بھارت کی ننگی جارحیت دنیا کے سامنے عیاں ہو چکی ہے، بھارتی جارحیت کے بعد پاکستان کے بھرپور جوابی وار سے بھارت کو ہوش کے ناخن لینے چاہئیں،پاکستان کا بھارت کو بھرپور جواب قابل تحسین اور قابل ستائش ہے۔
حمزہ شہباز نے کہا کہ پاکستان کا بچہ بچہ اپنی بہادر افواج کے پیچھے سیسہ پلائی دیوار کی مانند کھڑا ہے،ہماری بہادر افواج نے ثابت کیا کہ وطن کی طرف اٹھنے والی ہر میلی آنکھ کو نکال دیا جائے گا۔ انہوں نے مزید کہا کہ پاکستان ایک زندہ قوم ہے اور شہیدوں کی سرزمین ہے،پاک فوج اور جوانوں کی جنگی مہارت سے ساری قوم کے حوصلے بلند ہوئے ہیں۔
Short Link: https://urdu.app.com.pk/urdu/?p=595246
