اسلام آباد۔13اگست (اے پی پی):وفاقی وزیر برائے آبی وسائل محمد معین وٹو نے کہا ہے کہ پاکستان کے بڑے آبی ذخائر میں پانی کی سطح اس وقت اوسط سے زیادہ ہے، تربیلا ڈیم کی گنجائش 96 فیصد ہے جو کہ عام طور پر سال کے شروع میں دیکھنے میں آنے والی موسمی کم ترین سطح سے نمایاں تبدیلی ہے۔بدھ کو قومی اسمبلی میں وقفہ سوالات کے دوران رکن قومی اسمبلی ملک شاکر بشیر اعوان کے سوال کے جواب میں وفاقی وزیر نے کہا کہ سال میں دو ماہ تربیلا، منگلا اور چشمہ جیسے ڈیموں میں پانی کی سطح اکثر اپنی کم ترین سطح پر پہنچ جاتی ہے تاہم انہوں نے اس بات پر زور دیا کہ یہ رجحان موجودہ ذخائر کی سطح کے ساتھ بدل گیا ہے جو پورے ملک میں پانی ذخیرہ کرنے کی مثبت صورتحال کی عکاسی کرتا ہے۔
انہوں نے ایوان کو بتایا کہ آج تک تربیلا ڈیم 96 فیصد، منگلا 64 فیصد اور چشمہ 83 فیصد بھر چکا ہے، مجموعی طور پر قومی پانی ذخیرہ کرنے کی اوسط صلاحیت کے تقریباً 75 فیصد تک پہنچ گئی ہے۔مستقبل کی تیاریوں اور پانی کی قلت کے بارے میں سوالات کا جواب دیتے ہوئے وفاقی وزیر نے کہا کہ حکومت گھریلو پانی کی کمی کی پیش گوئیوں سے پوری طرح آگاہ ہے۔ انہوں نے کہا کہ وزیراعظم شہباز شریف ذاتی طور پر اس مسئلے کو حل کرنے کی کوششوں کی نگرانی کر رہے ہیں، ہر تیسرے دن اعلیٰ سطحی اجلاس منعقد کئے جاتے ہیں جس میں ذخیرہ کرنے کے نئے منصوبوں اور آبپاشی اور بارانی دونوں علاقوں کے طویل مدتی حل پر بات چیت کی جاتی ہے۔صوبوں میں پانی کی مساوی تقسیم کے سوال پر انہوں نے واضح کیا کہ 1991 کے واٹر ایکارڈ کے تحت طریقہ کار واضح طور پر بیان کیا گیا ہے جس پر سختی سے عمل کیا جا رہا ہے،
ہر صوبہ اپنا مختص حصہ وصول کرتا ہے اور پھر وہ اپنے پانی کو آزادانہ طور پر منظم کرنے اور استعمال کرنے کے لئے آزاد ہے۔شفافیت کو مزید یقینی بنانے اور غیر مساوی تقسیم کے خدشات کو ختم کرنے کے لئے وفاقی وزیر نے کہا کہ ٹیلی میٹری سسٹم نصب کیا جا رہا ہے، اس سے ہر صوبے میں پانی کے بہاؤ کی حقیقی وقت میں نگرانی اور تصدیق کی جا سکے گی، اس بات کو یقینی بنائے گا کہ کسی بھی صوبے کو اس کے مقررہ حصے سے کم پانی نہ ملے۔اگر کوئی صوبہ یہ سمجھتا ہے کہ اسے مختص کئے گئے پانی سے کم پانی مل رہا ہے تو وہ مخصوص اعداد و شمار یا مثالیں پیش کرنے کا خیرمقدم کرتے ہیں، اگر جان بوجھ کر کمی ثابت ہوئی تو سخت کارروائی کی جائے گی۔
