اسلام آباد۔31اگست (اے پی پی):پاکستان کیچ بال فیڈریشن کے جنرل سیکرٹری معین الدین تنولی نے کہا ہے کہ پرائیویٹ سیکٹر ملک میں کھیلوں کی ترقی کے لئے بھر پور کردار ادا کرے اورفیڈریشن کیچ بال کے کھیل کے فروغ کے لئے تمام تر وسائل بروئے کار لائے۔
گزشتہ روز میڈیا سے گفتگو کرتے ہوئے انہوں نےکہا کہ ملک میں کیچ بال کا کھیل نیا کھیل ہے اور کھیلنے میں یہ زیادہ مشکل نہیں ہے بلکہ والی بال اور تھروبال سے یہ ملتا جلتا کھیل ہے۔انہوں نے کہا کہ اس کھیل کو جلد از جلد تعلیمی اداروں میں بھی متعارف کروایا جائےگا جس کے بعد گراس روٹ سطح پر اس کے مقابلے کرائے جائیں گے۔
انہوں نے کہا کہ ملک میں یہ کھیل پاکستان کیچ بال فیڈریشن کے صدر مقبول آرائیں کی قیادت میں ترقی کرے گا اور حکومت کو بھی چاہئے اس کھیل کے فروغ کے لئے اقدامات کرے۔
انہوں نے کہا کہ پاکستان کیچ بال فیڈریشن آزاد کشمیر ، گلگت بلتستان سمیت صوبوں میں اس کھیل کی تنظیم نو کررہی ہے جس کے بعد قومی کیچ بال چیمپئن شپ کا انعقاد کیا جائے گا۔
