اسلام آباد۔25جنوری (اے پی پی):وفاقی وزیر انفارمیشن ٹیکنالوجی سید امین الحق نے کہا ہے کہ کورونا وباءکے دوران جہاں پوری دنیا میں کاروبار اور معیشت کا برا حال تھا، وہاں وزارت انفارمیشن ٹیکنالوجی اور اس سے منسلک تمام اداروں نے عام افراد تک آئی ٹی سہولیات کی فراہمی کیلئے بھرپور کردار ادا کیا۔ آئی ٹی مصنوعات کی برآمدی ترسیلات اس کی واضح مثال ہے جو جولائی تا دسمبر کے مختصر عرصہ میں 40 فیصد اضافے کے ساتھ 958 ملین ڈالر تک پہنچ چکی ہیں۔ ان خیالات کا اظہار انہوں نے وزارت انفارمیشن ٹیکنالوجی و ٹیلی کمیونیکیشن کے ذیلی ادارے یونیورسل سروس فنڈ کے تحت ضلع جہلم اور چکوال میں تیز ترین موبائل براڈ بینڈ سروسز کی فراہمی کے منصوبے کیلئے معاہدہ پر دستخطوں کی تقریب سے خطاب کرتے ہوئے کیکا۔ اس موقع پر سیکریٹری وزارت انفارمیشن ٹیکنالوجی شعیب احمد صدیقی، چیئرمین پی ٹی اے میجر جنرل (ر) عامر عظیم باجوہ سمیت دیگر اعلیٰ حکام بھی موجود تھے۔ تقریب سے خطاب کرتے ہوئے وفاقی وزیر انفارمیشن ٹیکنالوجی نے کہا کہ یونیورسل سروس فنڈ کی کارکردگی کسی سے ڈھکی چھپی نہیں جس نے 6 ماہ کے دوران ملک کے دور دراز اور پسماندہ علاقوں میں براڈ بینڈ سروسز کی فراہمی، موبائل نیٹ ورک میں توسیع اور فائبر آپٹک بچھانے کیلئے 14 ارب روپے سے زائد کے مختلف منصوبے منظور کئے۔ انہوں نے کہا کہ ہم پاکستان کی عوام سے کئے گئے وعدے پر قائم ہیں۔ ملک کے طول و عرض کیلئے بلا امتیاز منصوبے تیار کئے گئے ہیں انشاءاﷲ ہم عوام کو سہولیات کی فراہمی کیلئے ہر 15 دن بعد ایک نیا منصوبہ پیش کریں گے۔ تقریب سے خطاب کرتے ہوئے جاز نیٹ ورک کے چیف ایگزیکٹو آفیسر عامر ابراہیم نے کہا کہ یونیورسل سروس فنڈ کے اس پراجیکٹ اور اس جیسے کئی دیگر منصوبوں سے ثابت ہوتا ہے کہ ہم اپنے وعدوں کی پاسداری کا کتنا خیال رکھتے ہیں۔ انہوں نے کہا کہ ڈیجیٹل پاکستان وژن کی تکمیل کیلئے جاز نیٹ ورک اپنا موثر کردار ادا کرتا رہے گا، یہ دن جہلم اور خانیوال کے لوگوں کیلئے خوشخبری کا دن ہے، ہم ان اضلاع کے عوام کو مقررہ مدت میں تیز ترین براڈ بینڈ سروسز کی فراہمی کا اپنا وعدہ پورا کریں گے۔ قبل ازیں اپنے استقبالیہ خطاب میں یونیورسل سروس فنڈ کے چیف ایگزیکٹیو آفیسر حارث محمود چوہدری نے کہا کہ ہم سب سے پہلے وفاقی وزیر آئی ٹی سید امین الحق کے تہہ دل سے مشکور ہیں جنہوں نے یو ایس ایف پر اپنے بھرپور اعتماد کا اظہار کرتے ہوئے ملک کے دور دراز علاقوں تک براڈ بینڈ سروسز کی فراہمی کیلئے ہمیں ایک راہ فراہم کی، ہم نے ان تمام منصوبوں کی تکمیل کو اپنے لئے چیلنج بنایا ہوا ہے اور انشاءاﷲ وفاقی وزیر کی جانب سے دی گئی ٹائم لائن کے مطابق ان پر عمل درآمد ہوگا۔ حارث چوہدری نے منصوبے کے حوالے سے بتایا کہ جہلم اور چکوال اضلاع کے 263 پسماندہ علاقوں کیلئے 25 کروڑ روپے سے زائد کے منصوبے کے تحت تیز ترین موبائل براڈ بینڈ سروسز فراہم کی جائیں گی۔ کنٹریکٹ کی نیلامی جاز نیٹ ورک نے جیتی ہے اور ہمیں امید ہے کہ وقت پر یہ منصوبہ پورا ہوگا جس سے لاکھوں رہائشی افراد کو سہولیات کی فراہمی یقینی بنائی جاسکے گی۔
